Gaur jakinaraziko dute Eskoziako erreferendumaren egun zehatza

Atalak: Eskozia, Estaturik gabeko nazioak

2014ko udazkenean erabakiko dute eskoziarrek independente izan nahi duten ala ez.

Eskoziak 2014ko udazkenean egingo duen independentzia erreferendumaren data zehatza gaur iragarriko du Alex Salmond lehen ministroak. Han 14:00ak direnean egingo dute adierazpena, Euskal Herriko 15:00etan.

Data zehatza jakiteak joko handia emango du hemendik aurrera, eta estratega politikoek horren arabera erabaki bat baino gehiago hartuko dute, bai Eskozian bertan baita beste herrietan ere.

Adibiderik garbiena Kataluniakoa izango da, independentzia prozesuan aurrera doazen neurrian, erabaki beharko baitute beren galdeketa noiz egin: lehenago (Europar Batasuneko hauteskundeetan izan liteke), eskoziarrekin batera edo ondoren. Eskozian hautatuko duten datatik gertu egiteak Espainiaren itxitasuna agerian uzten saiatzeko balio dezake; baina ondoren egiteak ere baluke zentzua, Eskoziako emaitzak hainbat irakaspen eman ditzakeelako.

Izan ARGIAko bazkide: astekariko harpidedun edo argia.eusen laguntzaile