ANCren abisua Katalunian: “Kontsulta ez egitea traizioa litzateke”

Atalak: Herrialde Katalanak

Forcadell, ANCko presidentea (Arg: Edu Bayer / Eldiario.es)

Biltzar Nazional Katalaneko (ANC) presidente Carme Forcadellek ziurtatu du kontsulta atzeratzea “traizio handia” litzatekeela. Honekin ANC-k abisua eman die Generalitateari eta, bide batez, CiU eta ERCko zuzendaritzei. Prozesu subiranista deskafeinatzeko PPk azken aldian hasi dituen hurbiltze mugimenduen tranpan ez daitezela erori eskatu die.

“Prozesu honetan sinisten dugu, ez genuke ulertuko erreferenduma albo batera uztea beste gauza batzuk lortzeko, Kataluniako herriari egindako traizioa litzateke”, adierazi du Forcadellek. Hala eta guztiz ere, ANCko presidenteak adierazi du konfiantza duela CiU eta ERCren arteko itunean, prozesua aurrera ateratzeko.

ANCk adierazi du Generalitatea pairatzen ari den itomen ekonomikotik ateratzeko soluzio bakarra ez dela “prozesua mantsotzea, baizik eta azeleragailua sakatzea”.

ANC bilakatu da independentziaren aldeko herri mugimendu indartsuena Herrialde Katalanetan, eta zenbait momentutan hark hartuko dituen jarrerak erabakigarriak izan daitezke iritzi publikoari begira. Honekin lotuta, joan den astean YouTuben jarri zuten bideo honek arrakasta handia izan du. Euskaraz ez, baina ingelesez, frantsesez, gaztelaniaz eta alemanieraz azpititulatuta ikus daiteke.

CiUren jarrera dudan jartzen duen informazioa Madrildik

Joan den larunbatean El País egunkariak zekarren informazio baten arabera, Artur Masek eta Mariano Rajoyk egindako bilera pribatuan (sekretua diote Madrildik, baina sekretua ez al da existitu ez den bilera bat?), Madrildik babes ekonomikoa eskaini zioten Generalitateko presidenteari, CiUk ERCrekin hautsi eta proiektu subiranista albo batera uzten bazuen. El Paísen arabera, Masek erantzun zien denbora behar zuela prozesua pixkanaka deskafeinatzeko, militanteak ez haserretzeko moduan.

Ikusiko dugu informazio interesatua ote den, ala gerta daitekeenaren aurrerapen bat.

 Izan ARGIAko bazkide: astekariko harpidedun edo argia.eusen laguntzaile