Letonia Katalunia independentea estatu gisa onartzeko prest

Atalak: Estaturik gabeko nazioak, Herrialde Katalanak

Ehunka milaka pertsonak adierazi zuten independentzia nahi dutela Kataluniarentzat.

Letoniak Katalunia independentea aitortuko lukeen galdetu diote herrialdeko lehen ministroari. Erantzuna: “Prozesuak zilegitasun osoa badu, teorikoki hitz eginez, zergatik ez?”.

Valdis Dombrovskisek ACN agentziari egindako adierazpenetan esan du orain bi eguneko Via Catalana “oso mezu indartsua” izan dela eta kasu egitea beharrezko ikusten duela. Bere ustez Espainiako Gobernuak aukera ezberdinak aztertu behar lituzke Kataluniako independentisten eskaerak aintzat hartzeko. 1,6 milioi independentista atera ziren Generalitatearen arabera joan den asteazkenean, 400 kilometroko giza katea osatzeko.

Valdis Dombrovski, 2013ko abuztuan. Argazkia: Valsts kanceleja (Valdis Dombrovskiren blogetik).

Dombrovskisek elkarrizketan dio zail egiten zaiola PPk erabiltzen dituen argumentu legalei buruz iritzia ematea, baina Diada mezu indartsua izan zela uste du. “Esan dezakedana da mezu oso indartsua izan dela, guk iraganean bizi izan dugun gauza da”.

Herrialde Baltikoko lehen ministroa Europako Alderdi Popularreko kidea da, kontserbadorea. Estoniak, Letoniak eta Lituaniak egindako giza katea simulatu izanak ziurrenik hiru herrialde hauen konplizitatea irabazteko balio izan du. Herrialde Baltikoek egindako mobilizazioaz idatzi genuen aurreko batean.

Joan den asteazkenean, jendetza bildu zuen Via Catalana ekimenak Katalunia iparraldetik hegoaldera lotuz. Generalitateak emandako datuen arabera, 1,6 milioi pertsona atera ziren kalera, independentzia eskatzera.

Giza kateko irudi hautatuak ikus daitezke bideo honetan

Independentzia eta aldaketa soziala

Hedabideen arreta orokorra Kataluniako principat-a iparraldetik hegoaldera lotu zuen giza-kateak eraman bazuen ere, izan zen bestelako ekimenik ere Diada egunean. La Caixa inguratu zuten 8.000 pertsonak #EncerclemLaCaixa lemapean. Ekimenenean independentziaren aldeko oihuez gain, bestelako kutsu soziala duten aldarrikapenak egin zituzten, hala nola, kapitalismoaren, Artur Masen gobernuaren murrizketen edo finantza sistemaren aurkakoak.