Okzitanian Bastir! mugimendua prestatzen ari dira hizkuntza eta ekonomia soziala ardatz

Atalak: Estaturik gabeko nazioak, Okzitania

Okzitaniako bandera izarduna.

Okzitaneraren erabilera eta ekonomia soziala izango ditu ardatz Okzitanian sortzen ari diren Bastir! mugimenduak. Okzitanista guztiak batzeko balio dezakeela pentsatzen dute, eta aurrez ibilbide bat egina duen Partit Occità-k ere babestu du.

2014ko udal hauteskundeak buruan, gutxienez 100 udaletan dauzkate prest hautagaitzak, Tolosan barne. Hautagaitza gehiago sortzeko dei egin dute mugimenduko kideek Nationalia.cat, estaturik gabeko herrietan espezializatutako webgunean ikusi dugunez.

Bastir!-eko kideen hautes-programak bost puntu ditu. Hizkuntza okzitaniarraren sustapenak leku garrantzitsua du. Dagoeneko sortuta dituzten Calandretas eskola okzitaniar gehiago sortzea bultzatu nahi dute, baita okzitaniera-frantsesa gela elebidunen sorrera ere. Hizkuntzaren presentzia indartu nahi dute hedabideetan eta bizitza kulturalean.

Okzitanieraren egoerari buelta eman nahi diote hainbat taldek. (Arg: Wikipedia)

Bastir!-en programa, dena den, ez da hizkuntzara mugatzen. Ekonomia sozial eta lokalizatua bultzatu nahi dute.

“Bastir orain hiru urte sortu genuen eta 2014ko udal hauteskundeetan jarriko da lehen aldiz bozkatze aldera. Jendeak alderdiekiko eta politikarekiko interes falta handia duela baieztatu dugu. Hauteskundeak ireki nahi dizkiegu elkarte eta herritarrei”.

Partit Occitan-eko bozeramaile Guilhem Latrubesse-ren hitzak dira Carreinfo webgunean.

Okzitaniaz hitz batzuk

Ipar Euskal Herriak Okzitaniarekin egiten du muga. Lau estatutan zatituta dago: Frantzia, Espainia, Italia eta Monaco. Orotara jende asko biltzen duen lurraldea da, 15.500.000 biztanle 2006ko datuen arabera. Hiri nagusiak Marselha, Tolosa, Montpelhièr, Pau eta Niça dira, okzitanieraz idatzita. Beren hizkuntza propioa okzitaniera da, baina oso egoera ahulean dago frantziarren politika jakobinoak 200 urtez pairatu ostean. Calendreta beren eskola propioak sortu zituzten orain urte batzuk, eta bidea egiten ari dira nola hala. Egun 53 eskola daude herrialdean banatuta, Wikipedian 2013ko datuak iturri gisa irakur daitekeenez.

Okzitania (Iturria: Wikipedia)

Ikusiko dugu ea zer emaitza ematen duen ekimenak, bizilagun dugun kultura honen biziraupena baitago jokoan.