Artur Masek nazioarteko agintariei bidali dien gutuna euskaratuta

Atalak: Estaturik gabeko nazioak, Herrialde Katalanak

Gutuna ingelesez, egin klik handian ikusteko.

Hasi da borroka diplomatikoa Kataluniako independentzia prozesuaren harira. Batetik, Artur Masek nazioarteko agintariei prozesuaren alde egiteko eskatuz idatzi dien gutuna publiko egin da (hemen PDF formatuan); eta bestetik, Espainiako gobernuak enbaxadetara 210 orriko txostena bidali du, finean esateko, “separatismoak elkarbizitza hausten du”. Espainiako diplomaziak dio ziur dela kataluniarren porrotaz. Halere, gutun serioa da, eta ondoren duzue Masek Merkeli bidalitako gutuna itzulita. Ikusiko dugu zein diskurtsok egiten duen porrot.

Kantziler estimatua,

Kataluniako azken gertaerei buruz pertsonalki berri emateko idazten dizut. Abenduaren 12an Kataluniako Legebiltzarraren ehuneko hirurogeita bosta ordezkatzen dugun alderdi politikoek Kataluniako etorkizunari buruz erreferenduma egitea adostu genuen.

Erreferendumak bi galdera izango ditu. “Nahi al duzu Katalunia estatu izatea?”, eta baiezko kasuan, “Nahi al duzu Katalunia estatu independente izatea?”. Erreferenduma 2014ko azaroaren 9an izango da.

Prozesu hau kataluniar herriaren eskaera da, bai 2012ko azaroaren 25eko hauteskundeetan adierazia, baita behin baino gehiagotan ekintza herritarrez ere.

Hainbat txostenek diotenaren aurka, badira hainbat modu legal eta konstituzional Kataluniako erreferenduma egiteko. Horietako bost identifikatu ditugu gutxienez, eta Espainiako gobernuari idatzi diot hauen berri emanez.

Gure etorkizunari buruz elkarrizketa eta adostasuna bilatzen dugu Espainiako gobernuarekin.

Ziur naiz zugan fida naitekeela prozesu baketsu, demokratiko, garden eta europar hau bultzatzeko, zeinarekin kataluniar herria eta ni neu guztiz konprometitua gauden.

Fideltasunez,

Artur Mas

Bartzelonan, 2013ko abenduaren 20an