Irlandako 120 akademikok bat egin dute Israelen aurkako boikotarekin

Atalak: Palestina

Israelen boikotaren aldeko ekintza bat Irlandan.

Irlandako 120 akademiko baino gehiagok adierazi dute Israeli boikota egingo diotela beren esparrutik, Tel Aviv aurrera eramaten ari den nazioarteko legediaren urraketei erantzunez. Adierazi dute jarrera irmoa dela “Israelek nazioarteko obligazioak eta giza eskubideen printzipio unibertsalak bete arte”. Datozen asteetan atxikimendu gehiago lortzea espero dute.

BDS izenpean bataiatu zuten kanpaina: Boikota, Desinbertsioa eta Zigorrak. 2005ean abiatu zuten Palestinako gehiengo politiko, sindikal eta sozialak. Helburua Israelgo gobernua presionatzea da hiru helbururekin: Palestinako okupazioa amaitzea, palestinarren eskubideak aitortzea eta errefuxiatuen itzulera onartzea.

Haaretz egunkari israeldarrean irakur daiteke Israelgo gobernua boikot kanpainari aurre egin nahian ari dela. Bake negoziazioek aurki porrot egingo dutela espero dutenez, Israelgo Gobernua beldur da boikot kanpaina indartuko ote den. Bi aukera aztertzen ari dira ministroak, aipatu egunkariaren arabera: kanpaina publiko agresibo bat abiatzea boikotaren aurka; eta bestea, bide diplomatikoetatik lan egitea boikota legearen bitartez debeka dadin Israelen “lagunak” diren herrialdeetan.

Kanpaina indartzen

BDS kanpaina azken urteotan asko sendotu da, eta ikusi besterik ez dago Garaipenak atalean daukaten zerrenda luzea. Oraingoz, Israelgo enpresek milaka milioi euro galdu dituztela kalkulatu dute. Helburua da enpresari hauek beren gobernua presionatzea politika alda dezaten, euren galerak argudiatuta.

Boikota esparru ugaritan egiten da: ekonomikoa, diplomatikoa, kulturala eta kirolaren esparrukoa, besteak beste. Akademikoan zentratuta, hainbat izan dira lorpenak: Hegoafrikako 400 akademikok bat egin zuten 2011n mugimenduarekin, Erresuma Batua eta Kanadako elkarte akademiko nagusiek ere boikotarekin bat egina dute; Palestinarekin elkartasun mugimenduek indarra dute Indian, AEBn, Txilen, Brasilen, Pakistanen eta Europako hainbat herrialdetan ere.

Informazio gehiago:

BDS-ren webgunea.

BDS kanpainari buruz joan den astean Info7n egindako saioa.