Israelek guda krimenak egin ditu palestinarren aurka Amnesty Internationalen arabera

Atalak: Palestina

Israelgo armadak hildako zibil bat.

“Ia inpunitate osoz” dozenaka zibil hil dituztela soldaduek Zisjordanian, haurrak barne, gaur argitaratutako txostenean Amnesty Internationalek (AI). Trigger-happy: Israel’s use of excessive force in the West Bank edo euskaraz Gatilu-alaiak: Israelen gehiegizko indarra Zisjordanian txostenean 2011tik estatu juduak egindako erasoak jaso ditu GKE honek. “Israelgo soldaduek hildako palestinarrak ez ziren arrisku beren bizitzarentzat eta kasu batzuetan, frogatuta dago nahita egindako hilketak izan zirela, guda krimen gisa konta genitzakeenak”.

“Txostenak jasotzen du palestinar zibilen legez kanpo hilketak eta segurtasunik gabe zaurituak Israelgo indarren partetik”, dio Philip Luther AIk Ekialde Hurbilean eta Afrika Iparraldean duen zuzendariak. “Prostesta baketsuen aurka erabilitako indar abusibo eta errepikakorrak –eta soldaduen inpunitateak– ondorioztatzen du erabaki politikoa dela”.

Heriotz eta zaurituak

Iaz 22 zibil palestinar hil zituen Israelek Amnesty Internationalek dokumentatu duenez, gehienak 25 urtez azpikoak eta protesten testuinguruan erasotuak. Lau haurrak ziren. Nazio Batuen Erakundeak emandako estatistiken arabera, 2013an hildako zibilak gehiago izan dira 2011 eta 2012a batuta baino. Guztira, azken hiru urteotan 43 zibil hil ditu armadak. Protesta baketsuak, inguruan zeuden zibilak, giza eskubideen aldeko ekintzaileak eta kazetariak daude hil edo zauritutako pertsona hauen artean.

Al Jazeerak Londresko egoitzan dagoen AIko zuzendaria elkarrizketatu du. Honek dio: “Israelgo autoritateek ez dute nazioarteko estandarrak beteko lituzketen ikerketarik aurrera eraman aipatu krimenetan.

Heriotzez gain, AIk dio gutxienez 261 palestinar zauritu dituztela larri azken hiru urteetan soldaduek erabilitako su errealagatik, 67 haur barne. Urte kopuru berean, 8.000 zibil baino gehiago zauritu dituzte bestelako armak erabiliz, horien artean, plastikozko balak eta gas negar eragileak. Txostenak jasotzen duenez, epe honetan, Israelgo soldadu bakarra zigortu dute palestinar bat hiltzeagatik. Palestinarra Israelen sartzen saiatzen ari zen lan bila, eta tiro batez hil zuen soldadu anonimoak txostenaren arabera.

Testuingurua: Palestinako erresistentzia 2014. urtean

Palestinar bat Israel eraikitzen ari den murruaren alboan. (arg: L. Arbelaitz)

Palestinako egoeraz gehiago jakin nahi duen irakurleari pare bat erreferentzia. Batetik, azken Larrun pentsamendu aldizkaria Palestinari buruz idatzi dugu. Olibondoek zutik diraute erreportajean herri honetako okupazioaren aurkako mugimendu anitzei errepaso bat egin diegu.

Eta bestetik, joan den asteartean Info7 irratian Miren Amuriza eta biok izan ginen Eider Olazarrekin, Palestinan Euskal Herriko ordezkaritza batek ikusi zuena laburbildu asmoz. Entzun nahi duenarentzat, hemen dago.