Bi palestinar hil eta hamaika zauritu ditu Israelgo armadak ‘Nakba’ egunean

Atalak: Palestina

Israelgo soldaduak Qalandian manifestari palestinarren aurka egiteko tokia hartzen. (Arg: Al Akhbar)

Israelgo polizia indarrek bi palestinar hil dituzte Ramallahn, Nakba egunaren 66. urteurrena oroitzeko manifestazioetan. Batek 17 urte zituen, eta besteak 22, eta Maan informazio agentzia palestinarrak mediku iturriak aipatuz jaso duenez, biak munizioa erabiliz bularrean jota hil dituzte. Beste hainbat pertsona balaz zauritu dituzte.

Nakba palestinarrentzat hondamendiaren eguna da. Eta israeldarrentzat, Israelgo estatuaren sorrera eguna. Nakban zehar 760.000 palestinar beren etxeetatik bota zituzten 1948an, NBEk jasotako datuen arabera. Egun beren ondorengoak jada 5 milioitik gora dira, eta errefuxiatuek etxera itzultzeko eskubidea aldarrikatzen dute bai ala bai. Munduko errefuxiatuen heren bat palestinarra da, UNRWA agentziaren datuen arabera. Horrez gain, epaiketarik gabe atxilo dauden eta 22 egunez gose greban dauden presoak ere gogoan izan dituzte.

Egoera gordina bizi dute palestinarrek. Alternative Information Center-en webguneko “Etxera itzultzeko eskubidea nazionala da, ukaezina” artikulutik hartua da egoera kokatzeko paragrafo hau:

Nakbaren 66. urteurrenean, Palestinaren askatasunerako mugimendua nahastauta dabil. Alderdi politikoak zatituta daude, Palestinaren Askatasunerako Erakundea (PLO) funtziorik gabe, Aginte Palestinarra beste interes batzuk dituzten atzerritarren diru-laguntzen menpeko da, eta estrategia nazional kolektiborik ez dago.

Amaitzeko, errefuxiatu guneak nola sortu ziren 1948an desertuan galduta zebiltzan eta dena lapurtu zieten palestinarrak batuz. Eta ondoren, zer bilakatu diren gune horiek, asko Palestina historikoaren barnean, nahiz eta ez duten beren etxeetara itzultzeko eskubiderik.

Palestinar bat oihal-etxeen aurrean. (Arg: Wikipedia)

Bethlehem kanpoaldean dagoen Aida Camp errefuxiatu gunea, atzean “Apartheidaren murrua” ikusten dela.

“Irabaziko dugu”