Urr28 0

Kobaneren aldeko munduko martxa larunbatean, Bilbon manifestazioa

Bilboko manifestazioaren kartela.

“Kurdistango herriaren aurkako sarraskia gelditu! Estatu Islamikoa inperialismoaren tresna” lemapean, elkartasun manifestazioa deitu dute larunbatean Bilbon. 12:00etan abiatuko da udaletxetik eta Herri Kurduaren Elkartasun Ekimenak deitu du mundu mailako elkartasun egunaren baitan. Kobane (Rojava) Estatu islamiarraren eskuetan ez erortzeko borrokan ari den Kurdistango lurraldea da, Siriako estatuaren menpe dagoena, Turkiako estatuarekin mugan. Mundu mailako arreta deitu du (beranduegi?) kurduak praktikan jartzen ari diren balore aurrerakoiengatik.

Atxikimendu kanpaina abian jarri dute, eta jende erreferente ugarik egin du bat dagoeneko. Horien artean dira Bakearen Nobel Saria jasotako jendea (Desmond Tutu edo Adolfo Perez Esquivel), edo Noam Chomsky gisako pentsalari aurrerakoiak.

Ondorengo oharra argitaratu dute (hemen ingelesez) eta hainbat hizkuntzatara itzultzen ari da jendea:

2014ko azaroaren 1a, arratsaldeko ordu bietan: ISISen aurkako Martxa Globala – Kobanêgatik – Gizateriaren alde !

ISISek Ipar Siriako Kobanêko eskualde kurduaren aurkako kanpaina militarrari ekin dio hainbat frontetan. 2014ko martxotik Kobanêren aurkako ISISen hirugarren erasoa da. Aurreko bi aldietan ISISek porrot egin zuenez, indar handiagoz ari dira erasoan orain, Kobanê hartzeko asmoz.

Aurtengo urtarrilean, Kurdistan mendebaldeko (Rojava) kurduek, administrazio autonomoak ezarri zituzten, hiru kantoi eratuta. Kobanê da hiru kantoi horietako bat. Turkiarekin dauka muga Kobanêk iparretik, eta inguruan dituen gainontzeko muga guztiak Estatu Islamiarrak kontrolatzen dituen lurraldeak dira. ISIL (Irak eta Sortaldeko Estatu Islamiarra) AEBetan egindako arma astun eta modernoak erabiliz iritsi da Kobanêko mugara. Ehunka mila zibilek historia modernoko genozidio izugarriena sufritzeko mehatxua daukate. Kobanêko herria erresistitzeko ahaleginean ari da, oinarrizko arma arinak erabiliz ISILeko terroristen eraso zitalen aurrean, Kurdistan Mendebaldeko Herriaren Defentsa-Unitateen laguntza soilarekin (YPG eta YPJ), nazioarteko inolako babesik gabe.

Horregatik premiazkoa da ISISen aurkako -Kobanêren aldeko- eta Gizateriaren aldeko Martxa Globala.

ISILen aurka borroka egiteko nazioarteko koalizio deritzon horrek, ez dio lagundu era eraginkorrean erresistentzia kurduari, Kobanên gertatzen ari den genozidioaren lekuko izan arren. Nazioarteko legeari dagokionez ere ez dituzte egiazko betebeharrak bete. Koalizio zenbait herrialdek, Turkiak bereziki, diruz eta militarki laguntzen diete ISISeko terroristei Iraken eta Sirian.

Horregatik premiazkoa da ISISen aurkako -Kobanêren aldeko- eta Gizateriaren aldeko Martxa Globala.

Munduak Ekialde Hurbilean demokrazia nahi badu, Kobanêko erresistentzia kurduari lagundu behar dio. Rojavako autonomia demokratikoak Siriako herriei askatasunezko etorkizuna bermatzen die. Horregatik, “Rojava eredua” -Rojava garatutako jarrera sekular, ez-sektario eta demokratikoa- aniztasunean batasuna egikaritzen duen eredua da.

Orain ekin

Iritsi da beraz, jokalari globalei bestela pentsatzeko arrazoiak emateko unea.

Mundu osoko pertsonei dei egiten diegu Kobanêrekin elkartasuna adieraz dezaten. Irten kalera, zaudeten lekuan zaudetela.

Horregatik, zintzoki eskatzen dizuegu Kobanêren aldeko Martxa Globalarekin bat egin dezazuen. Bat egin erresistentziarekin, ISISen aurka -Kobanêgatik – Gizateriaren alde! Ekin orain!

Azpian munduko leku ugaritan larunbaterako deitzen ari diren manifestazioen kartelak.