Informazio askatasuna arriskuan, Europar Batasuna filtrazioak zigortzeko legea prestatzen ari da

Atalak: Komunikazioa

2013tik Europar Batasuna enpresen informazioa argitaratzearen aurkako zuzentarau bat prestatzen ari da. Corporate Europe Observatory elkarteko kide Martin Pigeonek salatu du Diagonal egunkarian, baita itun honen arriskuen berri eman ere.

Multinazionalei gustatzen ez zaien informazioa argitaratzea debekatuko luke lege honek.

Sekretu komertzialean oinarrituko litzateke legea. Horrela, “enpresaren izen ona kaltetuko lukeen edozein informazio edo barne dokumenturen” eskuratzea, erabiltzea eta legez kanpo argitaratzea zigortu nahi dute Pigeonen arabera.

Ikertzaileak adierazi du Europar Batasuneko herrialde guztietan sekretu komertzialaren definizio homogeneoa egiten ari direla, “TTIPa negoziatu ahal izateko”. Corporate Europe Observatoryk adierazi du lege berria onar dadin hainbat lobby presio egiten ari direla. Horien artean Trade Secrets and Innovation Coalition izenekoa, Nestlé, General Electric edo Alstom enpres erraldoiak biltzen dituena. Pigeonen hitzetan, “nazioartean asko dira inork beren kontuetan muturra sartzerik nahi ez duten enpresak farmazeutiken edo elikagaien sektorean”.

Sekretu komertzialari buruzko zuzentarau hau aurrera ateratzen badu Europako Batzordeak, europarrak izango dira kaltetuak bere ustez, “informazioa beharrean enpresen komunikatuak jasoko baitugu”.

Frantziako estatuan lehen saiakerak kale

Joan den urtarrilean Frantzian antzeko arau bat atzera botatzea lortu dute kazetari, prentsa elkarte, hedabide, erredakzio kontseilu, agentzia, blogari eta GKE ugarik. Macron Legean isilpean eta azken orduan sartu zuen gobernuak “sekretu komerzialari” buruzko emendakina. Teorian industria espioitzaren aurka egiteko zela esan zuten arren, hiru urteko kartzela zigorrak eta 375.000 euro arteko isunak ezarri nahi zituen “autorizaziorik gabe babestutako informazioaren ezagutza lortu, hau desbideratu edo argitaratzen dutenentzat”.

Gainera, zigorrak zazpi urteko espetxeraldira eta 750.000 euro artera igo zitezkeen “Estatuaren segurtasunaren aurka edo Frantziako oinarrizko interes ekonomikoen aurka atentatua” eginez gero. Frantziako kazetarien iritziz, emendakin horrek debekatu nahi zuen enpresentzat balioa duen edozein dokumentu argitaratzea. Enpresak erabakiko zukeen zer argitara dezakeen kazetariak ta zer ez. Eta kazetariak edo beren iturriak kartzelara joan zitezkeen interes orokorreko informazio bat argitaratzeagatik.

Informatzea ez da delitua elkarteko kide Charles Morelekin ere harremanetan jarri da Diagonaleko Gladys Martínez López kazetaria. Berari egindako adierazpenetan, “sekretu komertziala terminoaren zehaztasun eza eta definizioaren zabaltasunagatik, zuzentarau honek enpresaren eskuetan uzten zuen erabakitzea zer den sekretua”.

Europar Batasuna enpresen informazioa argitaratzearen aurkako zuzentaraua prestatzen ari da. Frantzian lehen saiakeran kale egin dute. Espainian Mozal Legea Kongresuan dagoeneko onartu dute. Argi dago informazioa boterea dela, eta botere handia duen jende batek ez duela nahi hau herritarrok izaterik.