Abu25 0

‘Ongi etorri Errefuxiatuak’, Alemaniako herri mugimendu solidarioa

Errefuxiatuei ongi etorri festa egin diete asteburuan.

Errefuxiatuekin lotutako albiste eta irudi gogorrak ikusi ditugu hedabide nagusietan azken asteetan. Ez da gutxiagorako: Mediterraneo itsasoan urtero hildako milaka pertsonak; gudatik eta probreziatik ihesean doazenei eraikitako hesi eta trabak Espainia hegoaldean, Italian, Maltan, Grezian edo berriki Mazedoniako mugetan; Alemanian neo naziek errefuxiatuen aterpetxe edo autobusei egindako erasoak…

Hala ere, bada era ikusezinean txingurri lan solidarioan ari denik ere. Refugees Welcome izenpean, Alemainako hainbat hiritan herritarrak antolatzen ari dira ezer gabe heltzen direnei babesa eman eta beren eskubideen alde borrokatzen laguntzeko. Webgune bat ere egina dute etxea errefuxiatuekin elkarbanatzeko prest dauden herritarrak hauekin harremanetan jartzea errazteko. Al Jazeeraren bideo labur honetan bikain azaltzen dute ekimena.

Hala ere, salbuespenak salbuespen, hedabideetan apenas duten lekurik esperientzia positibo hauek.

Festak ere antolatzen dituzte, eta asteburuan adibidez, ongi etorria egin diete errefuxiatuei Hamburgon. Jatorri ugaritako 500 lagun bildu direla irakur daiteke Revolution News gunean: Palestina, Siria, Afghanistan, Eritrea… Bertan bildutakoek besoak zabalik hartu dituzte laguntza beharrean iritsi diren herritar horiek.

Batzuek ogia eraman dute, besteek entsalada, besteek haragia, kafea, tea edo fruituak. Auzolanean prestatzen dituzte ekimenak, eta antolatzaileek argi utzi dutenez, ez dute inongo diru laguntzarik jasotzen. Etxeak eta maite dituzten pertsonak galdu dituztenei laguntzen jarraituko dute.

Facebookeko orri honetan ikus daitezke argazki gehiago, baina ederrak direnez, batzuk hona ekarri ditugu.