Asturierari bultzada eman eta ofizialtasuna aitortzeko eskatu dute

Atalak: Asturies

Asturieraren ofizialtasunaren aldeko manifestazioa, artxiboko irudi batean.

Asturieraren Defentsaren Aldeko Elkarteak (Xunta Pola Defensa de la Llingua Asturiana, XDLA) deia luzatu du Asturiasko Eguna den irailaren 8a baliatzeko hizkuntzaren aldeko aldarrikapena sendotzeko. Urteetan beren hizkuntza karikaturizatu eta gutxietsi egin izan dutela sinesten dute askok.

Azken hauteskundeen ostean, PSOE eta Izquierda Unidak adostu dute “hizkuntzaren inplantazioa, normalizazioa eta zabalkundea indartuko dutela administrazioan, hedabideetan eta eskoletan”. Hala ere, bi alderdiek “desadostasun garrantzitsuak” dituzte asturieraren estatus legalari dagokionez. Izquierda Unidak uste du hizkuntzak ofizial behar duela, eta PSOE aurka dago.

XDLAk uste du aukera berriak zabaltzen dituela horrek. Asturieraren Hizkuntz Akademiak (ALLA asturieraz), berriz, komunikatu oso kritikoa atera du PSOEren eta IUren arteko akordioaz. ALLAren ustez, ituna “beste aukera galdu bat da” hizkuntzari ofizialtasuna aitortzeko eta asturiera hiztunen eta gaztelania hiztunen eskubideak parekatzeko. Akademiak adierazi du irailean alderdi politiko guztiei igorriko diela “ofizialtasunerako proposamen konkretua”.

Irailaren 8ko Asturiesko Egunean “ospakizunarekin zerikusi gutxi duten artista espainiarrak alde batera utzi” eta bertako kulturaren alde ari diren herritarren presentzia indartzeko eskatu dute.

Ofizialtasunaren aldeko borroka

550.000 bat lagunek hitz egiten dute asturiera eta hauetatik 100.000k jatorrizko hizkuntza gisa dute, Wikipedian irakur dezakegunez.

1997ko uztailaren 4an Bimeneseko udalerriak hizkuntzaren ofizialtasuna aldarrikatu zuen, eta horrelakorik egiten zuen lehenengo herri asturiarra bihurtu zen. Beste herri batzuk, bata bestearen atzetik, gauza bera egiten hasi ziren: Morcin, Castrillon, Caso, Teverga, Laviana, Langreo eta Llanera. Ofizialki, Printzerriko epaitegi nagusiak bertan behera utzi zituen aldarrikapenak, baina Bimenesen ordutik urtero ospatzen dute “Fiesta de la Oficialidá“ jai-eguna.

Ofizialtasun eskaera bere bidea egiten ari da azken hamarkadetan.