Internazionalismoa lantzeagatik 6 urteko kartzela arriskua?

Atalak: Askapena, Desobedientzia zibila, Euskal Herria

Askapenako bost auziperatuak, milaka lagunen babesean manifestazioa Iruñean. (Arg: Ekinklik)

Espainiako Auzitegi Nazionalean 5 lagunen aurkako epaiketa hasi da. 6 urteko kartzela eskatzen dute beren aurka. 30 urteko ibilbidea duen Askapena mugimendu internazionalista ilegalizatzeko eskatu du fiskaltzak, baita Bilboko jai herrikoietan internazionalismoa lantzen duen Askapeña legez kanpo uzteko ere, eta Hego Ameriketatik produktuekin bidezko merkataritza lantzeko sortutako Elkar Truke eta Herriak Aske elkarteak disolbatzeko.

Euskal herritarron oinarrizko eskubide zibil eta politikoak zapaltzeko urte luzez erabili duten Garzonen “dena ETA da” aitzakiapean, “ETAren nazioarteko aparatua” deitu diete. Mila aldiz errepikatu ere, telebista, irrati eta egunkarietan. Auziperatuek baina, adierazi dute ez dutela ETArekin harremanik eta harro aldarrikatzen dutela Askapenako kideak direla, Euskal Herriko mugimendu internazionalista. Elkartasuna lantzen dutela. Eta kito.

Israel eta Coca Colaren aurkako nazioarteko boikot kanpainekin bat egin eta Euskal Herrian hauen alde lan egin dutela, nazioarteko herrialdeetara brigadak antolatu dituztela (Palestina, Kurdistan, Venezuela, Bolivia, Herrialde Katalanak, Sahara…) hango egoerak ezagutu eta atzerrian Euskal Herriko egoera politikoaren berri zabaldu eta elkartasun ekimenak sustatzeko. Egun “elkartasun” hitzarekin mozorrotzen den karitate dependentearen ordez, “bi norabideko elkartasuna” lantzen aritu direla azalduko dute Madrilera hainbat joan etorri eragingo dizkien epaiketan, lehen egunean ikusi den bezala. Italian 2012an Euskal Herriaren autodeterminazio eskubidearen alde egindako manifestazio nazionala edo Argentinan Garzoni egindako eskratxeak izan litezke erakunde honek egindako lanaren adibide batzuk.

Euskal Herrian milaka pertsona mobilizatu dira asteotan pertsona hauei babesa ematera, baita atzerriko hainbat hiritan ere. Eleak mugimenduarekin elkarlanean eta laranjaz panorama politikoa koloreztatuz, lege injustuen aurrean desobedientzia aldarrikatzen dute. “Eta zu, nor zara gu epaitzeko?” galdetu eta Espainiako estatua bera epaitu dute sinbolikoki herri askotan, historian zehar egin dituen eta egun egiten jarraitzen duen eskubide urraketengatik.

Auzitegi Nazionaleko epaia atera aurretik atera da euskal herritarron epaia: herriak zapaltzeagatik, Espainiako estatua errudun.

/