Donostiako auziperatuen gaiarekin lau bideo eta bi argazki

Atalak: Aktibismoa sarean, AskeGunea, Euskal Herria

Laburra izan asmo duen post bat: Gaur egun mugitu xamarra izan da Donostiako Aske Gunean, gehienbat goizean Ertzaintzak Ekaitz Ibero atxilotu izanaren ondorioz. Gerora, egoera normaldu eta antolakuntzarekin jarraitu dute, harik eta kontzentrazio bat egin eta zutabeetan etxeetara joan diren arte 20:30ak bueltan.

Norbaiti ez zaio batere gustatu kartzelara joateko agindua jasoa zuen Ekaitz Ibero azken bi hilabete ezkutuan pasa ostean, atzo gainontzekoekin batera publikoki agertu izana. Goiz partean, 11:00k bueltan, gunean jende gehiegi ez zegoela baliatuta, Ertzaintzak atxilotu egin du.  Gainera, bertan zeuden lekukoek esan dutenez, eta grabatu duten bideoan zerbait ikusten da, Ertzaintza gogor sartu da eta kolpeka bortitz sakabanatu ditu lurrean eserita Iberori eutsita geratu diren pertsonak. Hainbat pertsonak ospitalera joan behar izan dute. Hemen lehen bideoa.

Hemen lekuko izan direnen adierazpenak eta eguerdian egin duten kontzentrazioko irudiak bilduz Irutxuloko Hitzan egin duten bideoa.

Argazkia hau sarean asko zabaldu da, Ertzaintzak eragindako zauritua. Sei grapa jarri dizkiote ospitalean.

Argazkia ez dakit Twitterreko zein erabiltzailek igo duen, norbaitek baldin badaki, iruzkinetan utz dezala mesedez eta jarriko diot.

Arratsaldean ingurua txukundu eta programazioarekin jarraitu dute. Amaitzeko Iberori elkartasuna eta kartzela zigorra ezarri dieten beste zortziei babesa emateko kontzentrazioa egin dute. Iberoren hitzak ere entzun ahal izan dituzte bertaratutakoek, Martuteneko espetxean dagoen semeari deitu baitio aitak eta telefonoa mikrofonoaren ondoan jarri. Babesa adierazi dioten guztiekiko esker ona adierazi nahi izan du.

Kontzentrazioko argazki panoramikoa. (Arg: L. Arbelaitz)

Ondoren, Ertzaintza gazteak atxilotzera joaten denean aurrean izango duten herri harresia irudikatu nahi izan dute jendea auziperatuen inguruan jarrita. Ondorengo bideoan kontzentrazioaren amaiera ikus daiteke.

Amaitzeko, etxera buelta egin dute auziperatuek eurak babestera joandako herritarren zutabeekin. Goizean 8:30ean ere hala joan dire Aske Gunera. Hemen ikus daiteke bi gazte euren etxera heldu diren unea.

Izan ARGIAko bazkide: astekariko harpidedun edo argia.eusen laguntzaile