Guarani komunitate baten garaipen txikia Brasilen

Atalak: Guaraniak

Guaraniak beren lurretara itzulera ospatzen (Arg: Survival)

Brasilgo Guarani komunitate batek, urteetako borrokaren ostean, lortu du beren lurretara itzultzea, bertan zeuden baserritarrak mugituz. 200 bat dira indigenak, Survival guneak jakinarazi duenez. Baserritarren eta herrialdeko sistema judizialaren aurkako borrokan ia etsirik, zera adierazi zuten 2012an, desesperaziotik gertu: “Hil gaitzazue guztiak eta ondoren lur hauetan ehortzi“.

Herri honen aldarrikapenari neurri hartzeko balio dute Survival erakundeko zuzendariaren hitzek. Zera adierazi zuen orduan:

“Brasilgo herri indigenen desagertzeak herrialdearen historia zikintzen du, eta etsigarria da ikustea garai kolonialeko krudelkeria eta gehiegikeriek bere horretan irauten dutela, Brasilgo sistema judizialak babestuta. Pyelito Guaraniek egin duten aldarrikapena ezin garbiagoa da: beren lurrik gabeko bizitza miseria eta sufrimenduz hain betea dago, non ez duten bizi ere egin nahi. Brasilek neurriak hartu behar ditu beste herri bat suntsitu aurretik”.

2014ko martxoan, epaileak ebatzi du arrazoia dutela eta aldarrikatzen ari ziren lur sailera joan daitezkeela bizitzera. Ondorengo bideo labur honetan, guarani batek azaltzen du beren arbasoen lurretara itzuli nahi dutela.

Guaraniek une garrantzitsua bizitu zuten orain hilabete batzuk, Brasilgo Gobernuak onartu baitzuen eurek eskatzen zuten lurra berena zela, eta herri indigenen babeserako neurriak hartuko zituela. Badirudi albiste dugun hau horietako bat izatea. Joan den hilabetean Zeelanda Berriko Maori kazetari talde bat Guaraniekin izan da eta “Genozidio isila” erreportajea egin dute.

Guztira, 257.000 bat guarani bizi direla kalkulatzen da. Brasilen, Paraguayn, Argentinan eta Bolivian bizi dira eta beren hizkuntza propioa mintzo dute.