“Grezian herri mugimenduen berraktibazioa gertatzen ari da, erradikalizazioa”

Atalak: Altermundialismoa, Herri mugimenduak

Austeritate politiken aurkako manifestazioa Grezian.

Ordu erdiko elkarrizketa honetan, Theodoros Karyotis ekintzaileak Greziako herri mugimenduen eta Syrizako gobernuaren arteko harremanaz mintzo da. BioMe-ko kidea da, Thesalonikako langileek berreskuratutako fabrika. Elkarrizketa gaztelaniaz dagoen arren, oso gomendagarria da, Kasa Muntanyako kideek egina hainbat gai jorratzen dituzte:

Botere instituzionala vs. botere erreala

“Miresgarria da Syriza egiten saiatzen ari dena, lehen aldiz Europar Batasunean dudan jartzen ari baitira austeritate politiken eta neoliberalismoaren ortodoxia. Hala ere, arrazoi errealak aldatzen saiatu gabe ari da, Eurogunean Greziak duen parte hartzea dudan jarri gabe, eta hori da arazoaren muina. Testuinguru honetan Syrizak ez du negoziatzeko botererik…”

Karyotisen ustez, Syriza orain arteko bidea jarraitzera behartuko dute, nahiz eta agian hemendik aurrera “austeritate ezkertiarra edo aurpegi humanoa duen austeritatea” izan. “Egia da eurotik ateratzea desastre handia litzatekeela jende txiroenarentzat denbora luzean, baina epe luzera ekonomikoki zentzu handiagoa dauka”.

Greziako herri mugimenduen zerrenda.

Herri mugimenduen estrategia austeritate politiken aurrean

Karyotisek elkarrizketan azaltzen du Greziako herri mugimendua 2010etik mobilizazio ziklo handian sartu zela, eta beren artean ezberdintasun handiak izan arren, planteamentu oso aurrerakoiak egin zituztela. Mugimendu batzuk defentsiban aritu ziren, hau da, ordura arte lortutakoaren defentsan (ongizate estatua, langileen eskubideak…) eta beste batzuek, aurrekoa defendatu beharrean, hau gainditzea proposatu zuten.

“Gizartetik etorritako proposamen hauek demokrazia erradikal eta zuzena eskatzen zuten, baliabideen kudeaketa zuzena, erabakitze kolektiboa, eta ongizatea oinarritik eraikitzea”. Adibidez, klinika autogestionatuak ireki ziren Grezia osoan (osasun publiko politika berri bat proposatuz, kudeaketa komunitarioari bide emanez, Mendebaldeko medikuntza ortodoxoan oinarritua egongo ez dena), kiebra egin duten fabrikak berreskuratzen eta langileek autogestionatzen hasi ziren, Thesalonikan uraren pribatizazioa geratu zuten…

Syriza eta herri mugimenduen arteko gatazkak

Theodoros Karyotis ekintzaileak dio azken urteetan herri mugimenduen kriminalizazio handia izan zela, eta askok pentsatu zutela alderdien eskeman planteatutako soluzio politikoa zela aurrera egiteko aukera bakarra. “Hiru hilabeteren ostean, desilusioa dago, argi ikusten delako ezin dituela mugimendu hauen eskariak bete”. Bere ustez, frustrazioa dator botere errealari ez diola aurre egin nahi ikusten delako.

Omonia klinika soziala

“Boterea ez da gauza unitario bat”

Gobernu eskuindarrak daudenean, boterea gauza unitario eta monolitikoa balitz bezala ikusi ohi dela dio Karyotisek, herri boterearen aurka dagoen boterea. Baina ezkerreko gobernu bat dagoenean –”edo behintzat ezkerrekoa dela dioen gobernu bat”–, boterea gauza fragmentatua dela ikusten dela dio, ez dela gune bakarretik kontrolatzen.

“Botere judizialak bere arauak ditu, kontserbadorea da izatez eta ez du kostu politikorik, epaile bat epaile izango baita bihar ere eta jendeak ezin du aldatu. Oso kontserbadorea da eta botere ekonomikoarekin lotura du”. Horrez gain, botere politikoa herritarren eskaerekiko abegikorragoa da, baina beste botereguneei aurre egiteko zailtasun handiak ditu. Greziako oligarkia, hedabide eta enpresa handiak, burokrazia, kide faxistak dituzten segurtasun indarrak… “horren aurka ezin du egin Syrizak”.

Mugimenduen suspertzea

Ekintzaile greziarrak dio berriz ere mugimendu sozialen berraktibazioa gertatzen ari dela, erradikalizazioa. “Orain ikusten da mobilizazioak bakarrik ekar ditzakeela emaitzak”. Bere hitzetan, borrokak instituzionalizatzen direnean, erradikalizazioa galtzen dute. Norabide honetan, elkarrizketan herrialdeko telebista publikoarekin gertatu dena kontatzen du.

Elkarrizketa osoa:

Lotura interesgarriak:

Vio.Me: langileek autogestionatutako fabrika.

Greziako herri mugimenduen zerrenda eta loturak.