Ez dira kartzelara joango klima aldaketaren aurkako #Heathrow13 ekintzaileak

Atalak: Desobedientzia zibila

Auzipetuak epaitegitik irten diren unea. (Natasha Quarmby/Rex Shutterstock )

Londresko Heathrow aireportuan hesiak gainditu eta klima aldaketaren aurkako borrokaren testuinguruan, aireportuan pista berri bat egitearen aurka 22 hegazkin geratu zituzten 13 kideak ez dira kartzelara joango. Ehunka lagunen babesa izan dute epaitegi kanpoan. Aurreko batean jorratu genuen ekintzaile hauen kasua.

Epaiketan adierazi dute, ongi gogoetatutako ekintza izan zela, proportzionala eta beharrezkoa izan zela aire kutsaduraren eta klima aldaketaren bidez izango diren heriotzak ekiditen saiatzeko. Adierazi dutenez, Heathrow aireportuaren inguruetan, honek eragiten duen kutsaduraren erruz 31 pertsona hiltzen dira urtero bataz beste, eta mundu mailan milaka dira klima aldaketagatik hiltzen ari direnak.

Urtebetean Heathrown sartzea galarazi diete 13 kideei. Hauek ala ere ondorengoa adierazi dute: “Ederra da. Demokraziak irabazi du, mugimenduak irabazi du. Sententziak iraun bitartean Heathrown sartzea debekatua dugu, baina horrek ez du kentzen beste kide batzuek jarraituko dutela hirugarren pistaren aurkako borrokarekin”. “Zientziak garbi dio… Ezin da aireportu pista gehiago eraiki Erresuma Batuan, klima aldaketa serioski hartzen badugu”.

Ondorengoak dira 13 ekintzaile epaitu berriak:  Danielle Paffard, 28; Rebecca Sanderson, 28; Richard Hawkins, 32; Kara Moses, 32; Ella Gilbert, 23; Melanie Strickland, 32; Graham Thompson, 42; Sheila Menon, 44; Cameron Kaye, 23; Edward Thacker, 26; Alistair Tamlit, 27; Sam Sender, 23; eta Robert Basto, 67.

Epaitegi aurrean babesa adieraztera joan ziren ehunka herritar.