De Miguel Auzia: EAJri lotutako ustelkeria epaitegietan

Atalak: Euskal Herria

“De Miguel auzia EAEko ustelkeria prozesurik garrantzitsuena da”, deskribatu zuen Espainiako Botere Judizialaren Kontseilu Nagusiak 2017ko martxoan. EAJko hainbat kide-ohik gidatutako legez kanpoko komisioen ustezko trama epaituko dute. Fiskaltzak 119 urteko espetxe zigor eskaera egin die 26 auzipetuei.

Enpresari batek fiskaltzari egindako salaketak lehertu zuen gaia. Adjudikazio publiko baten trukean 100.000 euroko komisioa kobratu nahi ziotela salatu zuen. 24 grabazio eta emailak aurkeztu zituen froga gisa. Hari horri tiraka, Ertzaintzak mahai gainera atera zituen komisiotan kobratutako beste 700.000 euro, legez kanpoko operazioetan 16 milioi euro eta beste proiektu urbanistiko batean 65 milioi. EAJk Araban zuen bigarren arduraduna, Alfredo de Miguel diputatu ohia jotzen da komisioak kobratzeko enpresa sarearen buru. Poliziaren arabera sozietate horiek EAJk gobernatutako udaletxeetan –Zigoitia eta Lapuebla de Labarca– emandako obra publikoen kontratuen %4 inguruko ordainketak jaso zituzten bi alditan. Sekula egiten ez ziren aholkularitza-lan gisa kamuflatzen zituzten fakturak.

Ondorengo delituak egozten zaizkie besteak beste: Kontratazioan iruzurra, prebarikazioa, diru publikoaren erabilera okerra, dokumentu publikoen faltsuztea, influentzia trafikoa, funtzionarioen-eroskeria eta diru zirutzea. Orain arte, akusazio guztiak gezurtatu dituzte ikertuek; kasualitateak, gaizkiulertuak edo Ramos epailearen eta Izagirre fiskalaren “fabulak” direla adierazi zuen Cuatrecasas bufeteko De Miguelen abokatuak. Bide batez, Cuatrecasas abokatuen bufetea ere arakatua du Poliziak PPren ustelkeria kasuen harira.

Alfredo de Miguelez gain, Araba Buru Batzarreko kide izandako Koldo Otxandiano eta Aitor Telleria eseriko dira beren emazte Ainhoa Bilbao, Araceli Bajo eta Iratxe Gaztelu-Urrutiarekin; baita Arabako Parke Teknologikoko zuzendari ohi Alfonso Arriola, Jon Iñaki Echaburu, Francesc Fernandez Joval eta Jesus Arruti enpresariak, Eusko Jaurlaritzako Gazteria saileko zuzendari Xabier Sanchez Robles, Jaurlaritzako Kulturako kontseilari-orde Gurutz Larrañaga eta EAJk Leioan zuen zinegotzi Iñaki San Juan ere.

Orotara 150 lekuko eta peritok hartuko dute parte auzian. EAJk egindako adierazpenei behatuta, agerikoa da beldur diola auzia mediatiko bilakatzeari, ondorio politikoak kalkulaezinak direlako. Bere burua kudeatzaile on gisa aurkeztu ohi duen EAJri zer faktura pasako dion ikusteko dago. Europarekin beharrean, Espainiarekin konparatuz eraikitako Euskal Oasiaren ideia ez dela sostengatzen erakusten du epaiketako argazkiak.