Gaizka Garitanoren zortzi aipu euskarari buruz

Atalak: Euskara

Gaizka Garitano eta Jaime Altuna (Argazkia: …Eta Kitto)

Hauteskunde biharamunez Eibarren izan nintzen Euskararen transmisioa izeneko jardunaldietan –hurrengo ARGIAko alean aurkituko duzue han esandakoen berri– eta bertan, Gaizka Garitano Eibar Kirol Elkarteko entrenatzaile ohia ezagutzeko tenorea izan nuen. Beno, ezagutzekoa baino gehiago entzutekoa.

Bezperan, hauteskunde kiniela baten eta bestearen artean suertatu zitzaidan zeharka aditzea Eibar bigarren mailara jaitsi zela, eta beraz, imajinatu nuen Garitano ez zela txantxetarako egongo, niretzat hauteskunde biharamun soil zen astelehen hartan.

Dena den, eta zorionez, oso gutxi hitz egin zuen futbolaz. Entzuna eta ikusia nuen (suposatzen dut zuek gutiak lez) Almerian emandako prentsaurrekoan Garitanok izan zuen jarrera: txalogarria, ausarta, eredugarria. Ados, baina astelehen hartan Eibarreko entrenatzaile ohiak esandako hainbat aipuk eman zidaten zer prentsatua, prentsaurreko hartatik haratago, norbanako bakoitzak euskararen alde emateko daukagunaren gainean. Hare gehiago, futbola bezalako inguru espainolizatu batean. Horregatik, eta jardunaldian esandako beste zenbait gauza interesgarriri tartea egin ahal izateko erreportajetik kanpora utzi behar izan dudalako, Gaizka Garitanok esandako zortzi aipu jaso ditut hemen. On egin!

1. “Ez da erraza Espainiako markoan euskaraz egitea, baina gure eskubideak defendatu behar ditugu”

2. “Euskaraz bizi naiz, eta beti sentitu izan dut euskararen alde egin behar dudala”

3. “Komunikabideetan agertzen garenok euskararekiko konpromisua eduki behar dugu”

4. “Mila arazotan sartu ditut nire komunikazio arduradunak euskara lehenesteagatik, baina klubak beti lagundu dit”

5. “Euskara beste arduren mailan ipini arte nekez aldatuko dira gauzak”

6. “Autografo eske etortzen zitzaizkigun umeak gaztelaniaz hurbiltzeak zer pentsatu handia ematen dizu”

7. ” Euskaraz egitea, katalanez egitea ez bezala, politikarekin lotzen dute Espainian”

8. “Gauza txikiak egiten ditut: euskarazko elkarrizketak lehenetsi, ETB2n euskaraz egin, prentsa aretotan euskara sustatu…”