43 urte isolamenduan preso egin ostean, Albert Woodfox pantera beltz ohia aske

Atalak: Uncategorized

Woodfox aske geratu den unea.

Aske geratu da asteburuan Albert Woodfox, Pantera Beltz ohia eta Amnesty Internationalen arabera, AEBetako historian isolamenduan denbora gehien egin duen presoa. 43 urte eta 10 hilabete egin ditu itzalean berak ukatu egiten duen krimen batengatik. Hamarkadatan luzatu den auzi hau, azkenean, bi aldeen akordio batekin amaitu da eta 69 urte bete dituen egunean askatu dute. BBCk honela jaso du albistea.

“Nahiz eta hurrengo epaiketan nire inozentzia frogatzeko prest nengoen, nire osasunari eta adinari lotutako kezkek eraman naute kasua beste modu honetan amaitzea”.

Kartzeletan isolamendu egoera abolitzeko eskatzen duen eta horrela dauden presoen jarraipena egiten duen Solitary Watch elkarteak salatu du Woodfox salbuespen egoera baten biktima izan dela. Hiru alditan bere zigorra bertan behera geratu da Konstituzioaren aurka doazen zenbait gertaerengatik, tartean, fiskalaren jarrera okerra, defentsa desegokia, arraza diskriminazioa epaimahaia hautatzean, eta frogen desagertzea, besteak beste.

“Garaipen hau guztiona da, eta balio behar liguke elkar motibatzeko geroz eta sarriago erabiltzen den isolamendua abolitzeko, eta kartzelan dauden errugabe guztiak askatzeko”, diote Solitary Watch kolektiboko kideek.