Mar17 0

Bere muralak ezabatu ditu Blu artistak Bolonian, artearen merkantilizazioaren aurka

Atalak: Borroka teknikak, Komunikazioa, Street Art

Blu artista eta grafitero ezaguna bere lanak ezabatzen ari da Bolonian, gentrifikazio prozesuen eta artearen merkantilizazioaren aurka.

Ostegunean zabalduko duten Street Art: Banksy & Co izeneko erakusketarako, hainbat teknikarik bere lan batzuk beren jatorrizko lekutik mugitu dituztela ohartzean abiatu zuen Bluk ezabatze kanpaina. Erakusketan orotara 250 street art lan bildu dituzte, eta aurkakotasuna erakutsi duen arren, bere izena ere jaso dutela salatu du artistak.

Mundu mailan ezaguna den Blu grafitero artistak, Italiako Bolonia hirian 20 urtez egin izan dituen lanak ezabatu ditu asteburuan, ekintzaileen laguntzaz. Banku eta patrono aberatsek babestuta, museo batek street art-ari buruz prestatu duen erakusketaren aurka protesta egitea da arrazoia.

Bluk normalean gai sozialak landu izan ditu bere lanetan: sistema kapitalistari kritika, etxebizitzen espekulazioa eta kontrakulturaren aurkako errepresioa, La Directako erreportaje honetan irakur dezakegunez. Bere lanak mundu osoko hainbat hiritan ikus daitezke.

Bluk salatu duenez, azken hamarkadetan era honetako arte urbanoa ekintza bandaliko gisa saldu dute Boloniako erakundeek, gentrifikazio prozesuak bultzatzen zituzten bitartean. Egun, arte hau modan dagoenetik, sistema kapitalistak merkantzia bilakatu du. Hiriko paretak lekuz mugitu eta museo batean sartuz, museoko arrainak bailiran, “eraisketetatik eta klimaren ondorioetatik babesteko”.

Museoetan sartu aurretik, bere muralak ezabatzeko erabakia hartu du artistak.

Erreakzioak berehala etorri dira: hedabide nazionalek Blu-ren ekintzak ez duela zentzurik saldu dute, eta beste hainbat intelektual eta kolektibok, street art-aren dinamika erakusteko modu bakar gisa ulertu dute.

Blu-ren lan batzuk, begiradaren gozagarri

Azpiko bideo hauek benetan ikusgarriak dira.

Muto