‘Orain da unea’, Katalunian egingo duten Diada eguneko V erraldoiari begira

Atalak: Estaturik gabeko nazioak, Herrialde Katalanak

Irailaren 11n V erraldoi batekin azaroko kontsulta egin eta irabazi nahi dutela adieraziko dute milaka eta milaka kataluniarrek. Oraindik ere asko entzuten ez badugu ere gaiaren berri, dagoeneko kanpainan bete-betean sartu dira. Ireki dituzte izen emateko aukerak, eta itxura guztien arabera, beste mobilizazio erraldoi baten aurrean gaude. Ara és l’Hora izenarekin bataiatu dute kanpaina: Orain da unea. Mobilizaziorako dei eginez idatzi duten manifestu ederra daukazue euskaratuta bideoaren azpian.

Manifestua

ANC eta Òmnium Cultural elkarteak osatzen ditugun gizon eta emakumeok “Orain da Unea” kanpaina bultzatzen ari gara, 2014ko azaroaren 9an egingo dugun Kontsulta irabazteko. Gizarte zibil katalana osatzen duten gainontzeko erakundeei, antolakuntza politikoei, sozialei, ekonomikoei, eta herritar guztiei dei egiten diegu ondorengo puntuetan oinarritutako kanpainarekin bat egin dezaten.

1- Jendearen unea da. Azken urteetako mobilizazio masiboen ondoren, 2012ko irailaren 11ko eta 2013ko Via Catalanako parte hartze erabat arrakastatsuen ostean, aukera historiko baten aurrean gaude. Gure patu kolektiboaren jabe izateko aukera bikaina. Denon artean Europako herri berri bat eraikitzeko aukera daukagu.

2- Demokraziaren unea da. Orain guri dagokigu erabakitzea eta modu erradikalki demokratiko eta baketsuan egingo dugu. Lan egingo dugu herritarren nahi orokorra gailen dadin, hesi antidemokratikoak gaindituz eta atzean utziz status quo-a mantendu nahi duten horiek; ezer ez aldatzea nahi duten horiek.

3- Batasunaren unea da. Kanpainak erakutsiko du aniztasunean bat egiten dugun herria garela. Duela urte askotik elkarrekin bizitzen ikasi dugu eta kanpotik sortu nahi izan dizkiguten zatiketak gainditzeko gai garela erakutsi dugu. Herri batua garela erakutsiko dugu eta gutxi batzuentzat beharrean, denontzako izango den helburua lortzea erabaki dugu.

4- Eskuzabaltasunaren unea da. Oraindik gure proiektuan sinesten ez duten guzti horiei eskua luzatuko diegu. Azalduko diegu zer den Via Catalana, independentzia lortzeko bide demokratiko, baketsu eta inklusiboa. Katalunia eta Espainia bizilagun onak bilaka daitezen lagunduko digun bidea, posizio beretik hitz egin diezaioten elkarri, hau da, Estatutik Estatura.

5- Ausartak izateko unea da. (…) Gogoratu behar dugu hirugarren bide hori askotan saiatu izan dela eta ez dela sekula bete, “Ez” hautuaren aldekoek Estatu oso indartsu baten babesa dutela, bere hautua atera dadin medio posible guztiak erabiliko dituela. Orain arte bere argumentuak katastrofistak eta negatiboak izan dira. Goiz edo berandu, promesa faltsuak egingo dizkigute. Tinkoak izan beharko dugu. Eta lasaitasunez erantzun beharko dugu, probokazioen tranpan erori gabe, soilik erreakzio prezipitatuak bilatzen baitituzte gu ahultzeko. Ez gara utziko engaina gaitzaten. Erronkarik zailenei aurre egiteko ausardia izango dugu.

6- Modu bikain batean lan egiteko unea da. Lana daukagu eta ongi egingo dugu. Geure buruari jarri diogun erronkaren mailako kanpaina egingo dugu. Gure herriko profesionalik onenen bila joan gara, erabat inplika daitezen honetan, eta horrela, irabazi egin dezagun. Marketingeko aditurik onenak gurekin daude gure mezua alde guztietara hel dadin, soziologorik onenak ere bai dudan dauden horien kezka eta beldurrak ulertzeko, ingeniari, matematiko eta informatikoak irabazteko behar ditugun tresnak eskura izan ditzagun. Munduko kanpaina politikorik arrakastatsuenen sortzaileak eta komunikazio politikoko aholkulari ospetsuenak gurekin eta milaka bolondresekin lan egitera konprometitu dira. Herrialdeko bazter guztietara zabalduko dugu “Bai” eta “Bai” hautuaren aldeko gehiengo soziala. (…) Estatu independente baten aldeko gure argumentuak behar adina aldiz azalduko dizkiogu jendeari eta ondorengo elementuak dituen kanpaina batekin egingo dugu: argumentuak, sentimenduak, arrazoiak, argitasuna, ideiak eta baloreak.

7- Bozkatu eta irabazteko unea da. Gure etorkizun politikoa 2014ko azaroaren 9an hautesontzietan erabaki dadin konprometitu dira Kataluniako Legebiltzarrean ordezkatuta dauden indar politikoen gehiengoa, Generalitateko Presidentea barne. Lan egingo dugu inork eta ezerk ez gaitzan hautesontzietara joatea galerazi. Gure erronka da azaroaren 9an Bai-Bai hautuak irabaz dezan. Europako Estatu berri baten historia berrabiatzea gehiengo argi batekin bakarrik egin ahalko dugu. Ahalik eta jende gehienarekin kontatu nahi dugu, garaipena ere denona izan dadin nahi dugulako. Ahalik eta gehiengorik handiena izan nahi dugu. Badakigu posible dela, badakigu eskuragarri daukagula, badakigu ez dugula ezer irabazi oraindik. Gure esku dago eta egin dezakegu, oraingoan bai, orain bai. Orain gure unea da.