Block the Boat: Israelgo itsasontziak blokeatzea helburu AEBetan Palestinaren alde

Atalak: Borroka teknikak, Desobedientzia zibila, Estaturik gabeko nazioak, Palestina

Manifestariak Oaklanden portua blokeatzen.

Abuztuaren 16tik Israelgo Zim konpainiako itsasontzien aurkako blokeo kanpainan ari dira AEBetan, Palestinaren aldeko ekintzaileak. Lehenik, Zim Piraeus ontziaren aurkako blokeo kanpaina abiatu zuten Oaklanden, eta deskargatzea astebetez atzeratu dute, portuan piketeak egin eta itsasoan geldirik edukiz. Block the Boat ekimeneko kideek jakinarazi dute Zim konpainiako ontzi gehiagoren aurka egingo dutela, eta Los Angeles, Tacoma eta Seattle-ko portuetan blokeoak prestatzen ari dira. Israelen aurkako BDS boikot kanpainaren barnean kokatzen dute ekintza eta galera ekonomiko handiak eragiten ari dira itsasontzia horrenbeste denboraz geldi edukita.

Zim Integrated Shipping Services Israelgo itsas garraio konpainiarik handiena da, munduko hamargarrena. Zim Piraeus itsasontziak, blokeo egoera ikusita, Oaklandetik ateratzeko keinua egin zuen, manifestariak despistatu eta berriz ere itzultzeko. Protestariak baina, bertan zeuden eta mapa honetan ikus daiteke ontziak egindako bidea. Protestariek langileei eskatu zieten ez deskargatzeko barkua, eta hainbat egunez langileek protestarekin bat egin ostean, azkenean, hainbatek kargaren zati bat behintzat deskargatu zutela uste da.

2010ean Oaklanden bertan lortu zuten lehen aldiz Israelgo barku bat blokeatzea AEBetan, eta hainbat egunen ostean, Tacomako portura joan eta bertan hustu zuen merkantzia.

“Zim konpainiak dudarik gabe galera ekonomiko handiak izan ditu, eta Palestinarekiko nazioarteko elkartasunean mugarri indartsua jarri dutu, boikotaren, desinbertsioaren eta santzioen bidean”, adierazi dute antolatzaileek.

Itsasontzia hainbat egunez blokeatuta mantendu ostean bideo hau egin dute ekintzaileek.

ZIM konpainiaren aurkako ekintza.

Zim Chicago itsasontzia.