55 eguneko gose grebaren ostean aske utzi dute preso palestinar bat

2015-07-13  //  Palestina  //  Iruzkinik ez

Khader Adnan eta bere ama.

55 eguneko gose grebaren ostean, Khader Adnan palestinarra aske utzi dute Israelgo autoritateek. Adnan, ogibidez okina, urte luzeetan lanean aritu den ekintzaile palestinarra da. 2014ko uztailaren 8an atxilotu zuten eta ordutik atxiloaldi prebentiboan izan dute, inongo frogarik eta epaiketarik gabe espetxean. Igandean utzi dute aske eta garaipen gisa ospatzen ari dira palestinarrak.

Gose grebak iraun duen denbora, eskumutur bat eta hanka bat ohera lotuta egin ditu. Bere familiak ezin izan du bisitatu greba amaitu aurreko eguna arte.

(gehiago…)

Ehunka herritarren babesean atxilotu dute Alfon

2015-06-18  //  Desobedientzia zibila  //  Iruzkinik ez

Alfon atxilotu aurreko uneak (Arg: Asamblea popular de Carabanchel 15M)

Atxilotu dute Alfon Madrilen. Ehunka pertsonak inguratuta, hamarnaka jantzi eta maskara zuriz hornituta eta atxiloketa bera ekintza politiko bilakatuz. Pentsatzekoa denez, #AlfonLibertad eta #MuroHumanoAlfon traoletan dauden mezuak irakurrita, Madrilgo jende asko sentsazio gazi gozoarekin geratu da. Euskal Herritik ere elkartasun mezu ugari bidali ziren, azpiko mapan ikus daitekeenez.

Milaka txio bidali zituzten erabiltzaileek #AlfonLibertad traolarekin.

(gehiago…)

Lau urteko kartzela zigorra berretsi dio Gorenak Alfon gazteari, herri harresia Madrilen?

2015-06-17  //  Desobedientzia zibila, Herri mugimenduak  //  Iruzkinik ez

Alfon gaztea, asteartean egindako prentsaurrekoan. (Arg: Diagonal / Álvaro Minguito)

Espainiako Auzitegi Gorenak “Alfon” gisa ezaguna den Alfonso Fernandez gaztearen aurkako lau urteko kartzela zigorra berretsi du. 2011ko greba orokorrean leherkariak zituela egozten diote. Berak dena ukatu eta guztia muntaia dela salatzen du. Alfonen abokatuek azpimarratu dute fiskaltzak ez duela frogatu akusazioa. Berehala kartzelan aurkeztu behar duela ebatzi dute. (gehiago…)

Mapa: Demografia datuak Europan

2015-06-16  //  Bitxikeriak  //  Iruzkinik ez

Populazio aldaketa Europan 2001etik 2011ra. Gorriak esan nahi du hazi egin dela. Urdinak esan nahi du behera egin duela.

Azterketa interesgarria da, Alemaniako BBSR erakundeak egina. Kalitate handian kontsultatu nahi izanez gero, egin klik hemen.

Nikaraguako kanal berriaren aurka milaka pertsona atera dira kalera

2015-06-15  //  Uncategorized  //  Iruzkinik ez

Martxa jendetsua Nikaraguan (Arg: Confidencial)

10.000 lagunetik gora atera dira kalera larunbatean Nikaraguako Juigalpa hirian, gobernuak egin nahi duen kanalaren aurka protesta egiteko. 44 mila milioi euroko kostua izango duen makro proiektuak beren lurretatik bota nahi dituela salatu dute.

Beren bizimoduak erabat aldatzeaz gain, Nikaragua Lakua edo nahuatlez Cocibolca izenekoa kaltetuko dutela beldur dira. Ur gezako Erdialdeko Amerikako aintzirarik handiena eta munduko hemeretzigarrena da. (gehiago…)

500 lagun hil ditu gutxienez AEBetako poliziak 2015ean

2015-06-15  //  Gatazka armatuak  //  Iruzkinik ez

500 lagun hil ditu gutxienez urte erdian AEBetako poliziak, Global Research erakundeak zenbatu eta publiko egin duenez.

Aste honetan The Guardian egunkariak webgune berezia jarri du martxan. Dagoeneko zenbaketa 508n doala ikus daiteke. Ondorioztatu dutenez, AEBetako poliziak urteko lehen 24 egunetan jende gehiago hil du Ingalaterra eta Irlandako polizia indarrek joan den 24 urteetan baino, edo AEBetako poliziak aste batean jende gehiago hiltzen duela Alemaniakoak urte batean baino. (gehiago…)

Gogoratzen Gazako hondartzan jolasean ari zirela hil zituzten lau haurrak?

2015-06-12  //  Palestina  //  Iruzkinik ez

Israelgo armadako fiskal orokorrak esan du “istripu tragikoa” izan zela eta inoren aurkako kargurik gabe itxi dute ikerketa, Ma’an agentzia palestinarraren webgunean irakur dezakegunez. 9 eta 11 urte bitartean zituzten.

Nazio Batuen Erakundearen arabera, Israelek 50 egunetan 2.200 palestinar hil zituen, horietatik gutxienez 1.492 zibilak.

Israelek beste 26 mila milioi euro jarriko ditu boikot kanpaina borrokatzeko

2015-06-09  //  Palestina  //  Iruzkinik ez

Netanyahu Israelgo lehen ministroa.

BDS boikot eta desinbertsio kanpaina geroz eta arazo handiagoa da Israelgo gobernuarentzat. Nagusiki horri aurre egin asmoz sortutako Afera Estrategikoen Ministerioak neurri zehatzak proposatu ditu, tartean, 26 mila milioi euro gehiago bideratzea horra (100 milioi shekel israeldar).

Adierazi dutenez, hiru mailatan saiatuko dira BDSari aurre egiten: gobernu bulegoetan, inteligentzia komunitatean eta defentsa sisteman. Asteburuan Las Vegasen “anti-BDS” bilkura egin dute ekintzaile israelzaleek. Horiei zuzenduta, Netanyahuk adierazi du “Israelgo gobernuak programa asertibo eta berritzaileak” jarriko dituela abian, “mundu osoan gure aurka esaten ari diren gezurrak borrokatzeko”. (gehiago…)

Mapa: Europako aberastasunaren banaketa

2015-06-08  //  Ekonomia  //  Iruzkinik ez

Mapa honetan ikus dezakegu zein diren hiri eta eskualde aberatsenak Europan. Laukitxoen tamainak ekonomiaren tamaina adierazten dute, ez biztanle kopurua, nahiz eta askotan harremana izan. Lauki ilunak aberatsagoak dira Europako bataz bestekoa baino; lauki argiak txiroagoak. Nahiko agerikoa da aberastasunaren kontzentrazioa, eta hainbat lekutan desoreka handiak hirigune eta landaguneen artean. Horrez gain, era guztietako ondorioak atera daitezke.

Mapa 2014ko azaroan argitaratutako Mapping European Territorial Structures & Dynamics txostenetik aterea da.

“Grezian herri mugimenduen berraktibazioa gertatzen ari da, erradikalizazioa”

2015-06-04  //  Altermundialismoa, Herri mugimenduak  //  Iruzkinik ez

Austeritate politiken aurkako manifestazioa Grezian.

Ordu erdiko elkarrizketa honetan, Theodoros Karyotis ekintzaileak Greziako herri mugimenduen eta Syrizako gobernuaren arteko harremanaz mintzo da. BioMe-ko kidea da, Thesalonikako langileek berreskuratutako fabrika. Elkarrizketa gaztelaniaz dagoen arren, oso gomendagarria da, Kasa Muntanyako kideek egina hainbat gai jorratzen dituzte:

Botere instituzionala vs. botere erreala

“Miresgarria da Syriza egiten saiatzen ari dena, lehen aldiz Europar Batasunean dudan jartzen ari baitira austeritate politiken eta neoliberalismoaren ortodoxia. Hala ere, arrazoi errealak aldatzen saiatu gabe ari da, Eurogunean Greziak duen parte hartzea dudan jarri gabe, eta hori da arazoaren muina. Testuinguru honetan Syrizak ez du negoziatzeko botererik…” (gehiago…)

G7aren aurkako bideo bilduma, larunbaterako deia

2015-06-03  //  Altermundialismoa, Herri mugimenduak  //  Iruzkinik ez

Igandean eta astelehenean Bavarian bilduko da G7a. Ondorengo herrialdeak daude bileran: Kanada, Frantzia, Alemania, Italia, Japonia, Erresuma Batua eta AEB. Europar Batasunak eta Nazioarteko Diru Funtsak ere ordezkaritza izaten dute bileran.

Seattlez geroztik, munduko goi bilera hauen aurkako manifestazio antikapitalistak deitzen dira, eta azken urteetan istilu handiak izan dira. Elmaun egingo den goi bilerara protestatzera joateko dei egin du mugimendu altermundialistak. Leloa: Stop G7, kapitalismoaren, arrazakeriaren eta gudaren aurka. (gehiago…)

Ada Colau: “Lege injustuak desobeditu behar baditugu, desobedituko ditugu”

2015-06-03  //  Desobedientzia zibila, Herrialde Katalanak  //  Iruzkinik ez

Ada Colau, Bartzelonako alkatetzarako hauteskundeak irabazi berritan.

Bartzelonako alkate izateko aukera handiak dauzkan Ada Colaurekin elkarrizketa egin dute El Paísen. Hirian egin nahi dituzten aldaketei buruz mintzo dira, eta erabakitzeko eskubidearen inguruan daukaten konpromisoaz mintzo denean, kazetariak galdetzen dio ea zer egingo duten kontsulta baliogabetzen badiete. Hemen erantzuna:

“(Kontsulta) Egin daitekela defendatuko dugu. Lege injustuak desobeditu behar baditugu, desobeditu egingo ditugu. Erabat ukaezina da herritarrek aldaketa eskatzen dutenean, herritarrek beraiek azken hitza izatea. Gure erakundeei berriz ere zilegitasuna eman nahi badiegu, eta nik neronek sutsuki hori nahi dut, jendearen gehiengoak demokrazia gehiago eta hobea nahi du. Kontu handietan azken hitza herritarrek izatea apelaezina da”.

Bi kazetari hil dituzte Brasilen astebetean

2015-05-27  //  Adierazpen askatasuna, Komunikazioa  //  Iruzkinik ez

Djalma Santos da Conceição

Brasilgo irrati esatari Djalma Santos da Conceição hilik aurkitu dute Kazetariak Babesteko Batzordeak salatu duenez (CPJ ingelesezko sigletan). Larunbatean, Bahia estatuko ipar ekialdean bahitu zuten ezezagun armatuek eta ilunabarrean topatu dute bere gorpua, tortura zantzuekin. Kazetariaren hilketa Evany José Metzker blogari kritikoa burua moztuta aurkitu zutenetik astebetera gertatu da.

“Astebetean gertatu diren bi kazetari brasildarron heriotza basatiek adierazten dute prentsaren aurkako bortxa gora doala Brasilen, eta dagoeneko munduko herrialderik arriskutsuenetakoa da kazetari izateko”, adierazi du CPJ elkarteko kide Sara Rafskyk.

Santos da Conceiçãk 53 urte zituen eta 22.000 biztanle inguruko herrian goizeko irrati programa gidatzen zuen. CPJn jaso dutenez, kazetari polemikoa zen, eta krimen lokalaren eta ustelkeriaren aurkako neurriak eskatzen zituen. Hainbat heriotza-mehatxu jasoa zen.

Evany José Metzekerrek 67 urte zituen, Coruja do Vale bloga zuen eta haurren prostituzioa ikertzen ari zen, El Paísen irakur dezakegunez. Hau ere torturatu egin zuten, burua moztuta eta eskuak lotuta aurkitu zuten.

Evany José Metzker

#28akEreLibre kasua hamar puntutan

2015-05-07  //  Euskal Herria  //  Iruzkinik ez

1- Ezker abertzalearen ilegalizazio garaia igaro arren, ETAren borroka armatua amaitu arren, 2015ean jendea atxilotzen jarraitzen dute lan politiko soilagatik. Segiko kideak dira azkenak, hurrengoak Askapenako kideak batetik, eta Batasunako kideak eta herriko tabernen auzia bestetik. Frankismotik datorren Espainiako salbuespen auzitegi bateko epaileek erabakitzen dute nor doan kartzelara eta nor ez. Epaileen artean ere loteria makabroa da. Eusko Legebiltzarrak hainbatetan eskatua du auzitegi hau desagertzeko. (gehiago…)

Kataluniako Parlamentua inguratzeagatik zigortutako zortzi lagunak atxilotzeko agindua eman dute

2015-04-30  //  Herrialde Katalanak  //  Iruzkinik ez

(Arg: La Directa)

Espainiako Auzitegi Nazionalak hamar eguneko epea eman die Kataluniako Parlamentua inguratzeagatik hiru urteko kartzela zigorra ezarri dieten zortzi kideei. Ez badira espetxeetara beren kasa joaten, bilatze eta atxilotze agindua emango dute. Elkartasuna antolatzen ari dira auziperatuen lagun eta senideak. (gehiago…)

Zortzi manifestariri jarritako kartzela zigorra salatzeko Kataluniako Legebiltzarra inguratu dute berriz

2015-04-20  //  Desobedientzia zibila, Herrialde Katalanak  //  Iruzkinik ez

Bi kilometroko giza kateak Bartzelonako Ciutadellan dagoen Kataluniako Legebiltzarra inguratu du igandean. Aturem el Parlament ekintzagatik zortzi manifestariren aurka jarritako hiru urteko kartzela zigorra salatu nahi izan dute modu horretan.

2011ko ekainaren 15ean, milaka pertsonak Kataluniako Legebiltzarra inguratu zuten politikariak bertara iritsi aurretik. Egun hartan Kataluniako Generalitatearen Aurrekontuei egindako osoko emendakina atzera bota behar zuten, eta beste hainbat gauzaren artean, murrizketa gehiago onartuko zituzten. Legebiltzarkideak txistuka, aldarrikapenak eginez eta irainen artean hartu zituzten. Egunean zehar Mossoak oldartu egin ziren manifestarien aurka eta horietako hainbat atxilotu zituzten. (gehiago…)

Krimeako tatarerazko telebista bakarra lizentziarik gabe utzi du Errusiak

2015-04-08  //  Tatariarrak  //  Iruzkinik ez

Krimeako tatareraz lan egiten duen munduko telebista kate bakarra, ATR, lizentziarik gabe utzi du Errusiak. Erabakia teknikoa izan dela adierazi diete Nationalian irakur daitekeenez, legedia betetzeko eskabideak ez dituela garaiz bete argudiatuz. Internet bidez emititzen jarraitzen du eta lotura honetan ikus daiteke telebista berak nola eman duen albiste honen berri. (gehiago…)

Aktibismo sortzailearen nazioarteko jardunaldiak Donostian

2015-03-18  //  Aktibismoa sarean  //  Iruzkinik ez

“Gaizkiarekin nola amaitu” jardunaldien bigarren edizioa antolatu dute martxoaren 25etik 28ra, Donostiako Guardetxean. Aurkezpenak eta tailerrak izango dira lau egunetan “krisi orokortu honetan jarduteko modu berriak pentsatzeko”. Lehen edizioa Bartzelonan egin zuten 2012an eta oraingoan ere nazioarteko ekintzaileak lotu dituzte egitarauan. (gehiago…)

Irlandan elkarbizitza sustatzeko saioak IRAko kide eta soldadu britainiar ohien artean

2015-03-11  //  Irlanda Iparraldea  //  Iruzkin bat

Britainiako militar ohiak Derryn, Irlanda Iparraldean. (Arg: The Guardian)

Erresuma Batuko lau militar ohi eta IRAko lau kide ohiren arteko bileraren kronika argitaratu du The Guardian egunkariak. Irlandan ere elkarbizitza eta bakea sustatzeko lanean ari dira hainbat erakunde.

Bi ordu iraun zuen aurrez aurrekoa giro onean joan zela dio Ian Cobain kazetariak. Zortzi pertsona hauek armak zergatik hartu zituzten, beren erabakien ondorioak eta bake iraunkorrari egin nahi lioketen ekarpenaz mintzatu ziren. Deigarria da IRAko kide ohiek ez dituztela beren izenak eman nahi izan, militar ohiekin biltzeagatik Derryko hainbat herritarren partetik kritikak jasoko dituzten beldurrez. (gehiago…)

Espainiako Gobernuak “ez du inolako konpromisorik torturaren aurka” Amnesty Internationalen iritziz

2015-02-26  //  Euskal Herria, Memoria  //  Iruzkinik ez

Paco Etxeberria azalpenak ematen, atzean Joxe Arregi eta Unai Romanoren argazkiak dituela.

Torturaren iragana eta oraina Espainiako estatuan, gaitz honen aurkako babes eraginkorrak. Gai horren bueltan aritu dira asteazkenean Donostiako Koldo Mitxelenan lau eragile: Argituz elkartea, Tortura prebenitzeko eta salatzeko koordinakundea, Amnesty International eta Paco Etxeberria forentsea. Moderatzaile lanetan Mariano Ferrer kazetari beteranoa aritu da mukuru beteta egon den aretoan.

“Tortura ezaguna da Euskal Herrian, baina nahikoa ezagutzen al dugu? Ezagutzen al ditugu delitu honen tamainak, ondorioak, berau aplikatzeko tekniken eboluzioa, eta estatuen hipokresia guztia?”. Galdera zorrotzekin ireki du Ferrerrek saioa. (gehiago…)

“Euskararen aldeko mugimendua ezagutzea senide batekin topo egitea bezala izan da”

2015-02-25  //  Estaturik gabeko nazioak, Jatorrizko herriak, Maia herria, Wallmapu  //  Iruzkinik ez

Euskal Herrira etorritako lagunek taldeko argazkia Garabideko kideekin.

“Zertarako lorpen guztiak, hizkuntzarekin batera nortasuna galtzen badugu?”. César Pilataxi kitxuaren gogoetak zabaltzen du Beltzean Mintzo: Ameriketako jatorrizko hizkuntzen arnasaz dokumentala. Zer ari da gertatzen Atlantikoaren bestaldean? Euskaldunon esperientziak nola lagun dezake prozesu horretan? Garabide elkarteak gaia mahai gainean jarri nahi izan du lan honekin.

Garabideren Hizkuntza Biziberritzeko Estrategiak masterra egitera Euskal Herrira etorritako hainbat kide dira protagonista. 45 minututan ondorengo hizkuntza komunitateak ordezkatzen dituzte: Kitxua, nasa, nahuatl, kaqchiquel, aimara, maputxe eta maia yukatek. (gehiago…)

Informazio askatasuna arriskuan, Europar Batasuna filtrazioak zigortzeko legea prestatzen ari da

2015-02-23  //  Komunikazioa  //  Iruzkinik ez

2013tik Europar Batasuna enpresen informazioa argitaratzearen aurkako zuzentarau bat prestatzen ari da. Corporate Europe Observatory elkarteko kide Martin Pigeonek salatu du Diagonal egunkarian, baita itun honen arriskuen berri eman ere.

Multinazionalei gustatzen ez zaien informazioa argitaratzea debekatuko luke lege honek.

Sekretu komertzialean oinarrituko litzateke legea. Horrela, “enpresaren izen ona kaltetuko lukeen edozein informazio edo barne dokumenturen” eskuratzea, erabiltzea eta legez kanpo argitaratzea zigortu nahi dute Pigeonen arabera. (gehiago…)

Exekutatu egin dute Iranen 97 egunez torturatu zutela salatu zuen kurdu gaztea

2015-02-20  //  Kurdistan  //  Iruzkinik ez

Agindu zuten bezala eta ARGIAn jaso genuen gisan, otsailaren 19 arratsaldean Iranen urkatu egin dute Saman Naseem 22 urteko gazte kurdua. France24 kateak zabaldu du albistea.

Herrialde hartan ilegalizatuta dagoen PJAK alderdi kurduko kide izatea egotzi zioten, eta 17 urte zituela Irango Iraultzaren Guardiako kide bat hil izana sinatu zuen. Gerora, 97 egunez torturatu zutela salatu zuen, baita autoinkulpazioak erabat ukatu ere. Nire exkuzioaren zain, gutun bat Ekialdeko Kurdistandik gutunean Naseemek ondorengoak salatu zituen: Beso eta hanketatik zintzilik izan zutela ordu luzez, ez ziotela lo egiten utzi, bere senideak ere atxilotuta zeudela esan ziotela eta hil egingo zutela. Besteren artean dio, “bizitzaren eta heriotzaren artean” zegoen unean sinatu zuela autoinkulpazioa.

Torturapean sinatutakoagatik 22 urteko kurdua exekutatu nahi dute Iranen

2015-02-17  //  Kurdistan  //  Iruzkinik ez

Torturapean ateratako deklarazioagatik Saman Naseem izeneko kurdua exekutatuko dute ostegunean Iranen. Herrialde hartan ilegalizatuta dagoen PJAK alderdi kurduko kide izatea egozten diote, eta 17 urte zituela Irango Iraultzaren Guardiako kide bat hil izana sinatu zuen. Gerora, 97 egunez torturatu zutela salatu du, eta autoinkulpazioak erabat ukatu ditu egun 22 urte dituen auzipetuak.

Nire exkuzioaren zain, gutun bat Ekialdeko Kurdistandik gutunean Naseemek ondorengoak salatu ditu: Beso eta hanketatik zintzilik izan zutela ordu luzez, ez ziotela lo egiten utzi, bere senideak ere atxilotuta zeudela esan ziotela eta hil egingo zutela. Besteren artean dio, “bizitzaren eta heriotzaren artean” zegoen unean sinatu zuela autoinkulpazioa. Bere familiak salatu du eskuko azkazalak kendu zizkiotela. (gehiago…)

Yihadismoz mozorrotu digute terrorismoaren definizio berria

2015-02-05  //  Aktibismoa sarean, Desobedientzia zibila  //  Iruzkinik ez

Rajoy eta Sanchez terrorismoaren itzala zabaltzen.

Charlie Hebdoren aurkako atentatuaren ostean, Europan bromak amaitu zirela komentatzen zigun Gorka Bereziartuak ARGIAn. Askatasun murrizketak usaintzen ziren Europan. Gorpuak bero zirela antolatu zuten goi bilera antiterroristan hamarnaka barne ministro bildu ziren. Emaitzak ikusten hasi gara.

Frantzian Vallsek martxorako iragarri ditu neurriak. Espainiako estatuan, 15 egun nahikoak izan dituzte PPk eta PSOEk jokaldia gauzatzeko. Otsaila hasi dugunerako onartuta. Itxura guztien arabera, parte handi batean behintzat aurretik prest zeukaten askatasun murrizketa sortari Yihadismoaren aurkako ituna deitu diote. Gaur yihadista dena, bihar beste edozer izango da. Txantxa gutxi Euskal Herrian sobera ezagutzen ditugun praktika hauekin. Hemen irakur daiteke PDFan osorik. (gehiago…)

Donostiako AskeGunean parte hartzeagatik 15 hilabeteko kartzela zigorra eskatzen dioten gazteak muntaia salatzen du

2015-01-29  //  AskeGunea  //  Iruzkinik ez

Edurne Martinez altsasuarrari 15 hilabeteko kartzela zigorra eta isuna eskatzen diote Donostiako AskeGunean parte hartzeagatik. “Autoritatearen aurkako atentatua” egozten diote, eta berak erabat ukatzeaz gain, muntaia poliziala dela salatzen du. “Edurnerekin1” ekimena abiatu dute Martinezi babesa adierazteko. (gehiago…)

Preso saharar bat torturen ondorioz hil dela jakinarazi dute

2015-01-28  //  Mendebaldeko Sahara  //  Iruzkinik ez

Baqi Aliyen Antahah (Arg: porunsaharalibre.org)

22 urteko Abdul Baqi sahararra Kartzela Beltza deitzen dioten El Aaiungo espetxean hil da, jasandako tortura eta tratu txarren ondorioz Saharako Errepublika Arabiar Demokratikoan. Lurralde Okupatuetako eta Diasporako Ministerioak zabaldu du informazioa.  Salatu dutenez, azken bi urteetan zortzi saharar hil dira Marokoko kartzeletan. (gehiago…)

Israelek 15 urtetik beherako 1.266 haur palestinar atxilotu ditu 2014an, PLOk salatu duenez

2015-01-26  //  Palestina  //  Iruzkin bat

Haur preso palestinar bat.

Israelgo indar armatuek 15 urtez azpiko 1.266 palestinar atxilotu zituzten iaz Zisjordanian. Palestinaren Askapenerako Erakundeak (PLO ingelesezko siglekin) eman ditu datuak.

Atxiloketa hauen gehiengo zabala urtearen bigarren erdian gertatu zirela adierazi du Abdul-Nasser Farawnak, PLOren Presoen Autoritateen buruak. (gehiago…)

Independentziaren bideari berrekiteko OUI Quebec mugimendua sortu dute

2014-12-12  //  Quebec  //  Iruzkinik ez

OUI Quebec independentziaren aldeko mugimendua aurkeztu dute aste honetan, Le Devoir egunkarian irakur dezakegunez. Quebecen bi aldiz egin dute independentziari buruzko erreferenduma, eta bietan ezezkoak irabazi du. Lehenengoa 1980an; baiezkoak %40,44 lortu zuen. Bigarrenean, 1995ean, %49,3an geratu zen.

Azken inkesten arabera, %32-34 inguruk babestuko lukete independentzia. Eta gauzak horrela, “herritarrek garrantzi berezia izango duten mugimendua” osatu dute. Mugimendu ez-alderdikoia izango dela adierazi dute. Baita “burujabetza” kontzeptua alde batera uztea erabaki dutela ere, “lausoa delako”. Horren ordez, independentziari buruz hitz egingo dute zuzenean.

Txeiene eta arapahoek Sand Creek-eko Sarraskia oroitu dute, 150. urteurrenean

2014-12-02  //  Arapahoak, Estaturik gabeko nazioak, Txeieneak  //  Iruzkinik ez

Herritarrek omenaldia egin diete bertan hildakoei.

Txeiene eta Arapaho herrietako kideek, AEBetan gizon zuriak egindako eta oroimen kolektiboan iraun duen sarraski handietako bat oroitu dute asteburuan. 1864ko azaroaren 29an 700 bat soldaduk 150 bat txeiene eta arapaho hil zituzten, gerora Sand Creek-eko Sarraskia gisa oroituko zen egun beltzean. Native News guneak jaso du omenaldiaren albistea, 150 urte bete diren honetan. Ingelesezko Wikipedian informazio ugari dago. (gehiago…)