Baigorriko txalupa

Atalak: Gizartea

[Euskadi Irratiko iritzi tartean plazaratu du artikulu hau Pello Zubiriak gaur]

Ohartuak izango zarete gure eliza asko txalupak direla barrendik, azpikoz gain ipinitako itsasontziak. Herenegun iluntzean Baxenafarroako Baigorriko elizan ginen, eta bi ordu eta erdi luzez sentitu ginen kanpoko ekaitzetik urrunduta bezala txalupa zaharraren tripa-barrenean. Nafarroaren Egunaren bezperan urtero bezala, kantaldi berezia. Aurtengoan: “Et Incarnatus” orkestra, Iruñeko gaiteroak, Baigorriko gaiteroak eta Eltzegor taldea.

Baigorriko euskaltzaleek 30 urtez antolatu dute Nafarroaren Eguna, aurretik kultur ekitaldiz hornitua, eta urteotan politikan bezala herrigintzan eta jendeen arteko harremanetan klase guztietako eguraldiak zeharkatu dituzte, izan eguzki bero, ekaitz trumoitsu edo xiri-miri bustikor. Larunbateko kantaldian bildu ginenok elkarrekin dastatu genuen urteotan Baigorriko sotoetan Basaizea elkartekoek ondutako ardoaren gozoa. Han kantari gozatu ginenok berdin izan gintezkeen elkarrengana aterbetutako arraunlari nekaezinak edo inguru osoa inarrosten duen tsunamiaren erdian balearen urdailean babestutako naufrago zoriontsuak. Bai, garaiotan kanpoan sekula baino ilunago da. Norabidea erakuts diezagukeen ilargi amandrea ez da ageri eta mila lekutatik kolpatzen gaitu haizeteak. Nola behar zaio deitu, katastrofe hitzarekin ez bada, hilabete gutxitan kontsumismo zoroenetik depresio ekonomikoan murgiltzera ekarri gaituen galernari? Zein izenez bataiatu langabeziaren itolarrian egunetik egunera murgiltzen doazen beharginen kopurua? Tsunami batekin konparatzeko modukoa ez ote da abertzaleok bizi dugun egoera? Ez dakigu hondamendiak zer desegingo duen, zer matxuratuko eta zer lagako duen osorik. Torturatzen gaitu denboralea baretutakoan zein panorama aurkituko dugun pentsatzeak. Baina biharkoa ikusiko badugu egunotan dilubioa behar dugu zeharkatu. Herenegun Eltzegorrekin batera errepikatu genuen Pello Mari Otañoren hura: “Guraiziakin bereizi arren / bakoitza bere aldetik / ezagutzen da jantzi direla /zazpiak oihal batetik”. Baigorrin elkartasunaren txalupan bizirik eta libre sentitu ginen ekaitz itsuaren erdian.