Aurtengo oporretan… etxean edo inguruan

Atalak: Ekonomia

Time aldizkariaren azala

Krisiak aldarazi ditu, antza, mundu aberatseko kontsumitzaileen oporretarako ohiturak ere. Akabo kontinente batetik besterako bidai “demokratikoak”? Berriro ere, beti izan den legez, Egiptoko piramideak bisitatzea edo Baliko hondartzetan bainatzea aberatsen gutixia izanen dira, gehienera jota jubilazioarekin irabazitako sari oparoa? Europako gazte lizentziatu berriei laster ahaztuko ote zaie ikasketen amaiera ospatzeko Cancunera joateko irrikia? Krisiaren uholdea oraingoz ez da hain urrun iritsi, baina dagoenekoz beharrak eraginda oporrak etxean edo inguruetako parajeetan igarotzea, moda bihurtzeko bidean da.

Komunikabide handiak hasi dira interesatzen kontuarekin. Newsweek astekarian Sophie Grove-k erreportaje zabala idatzi du: Staying Home for the Holidays (Oporretan etxean geratzea). Eta ez da soilik herritarrek ekonomiaren izoztearekin ez dutela lehen adina erreztasun urrutira joateko. Orain, gainera, turismo asko erakartzen zuten herrialdeak bisitari faltan daude eta… etxe barruko turismoa sustatzeko kanpainak hasi dira nonahi, enpresek edo gorbernuek sustaturik.

Ingelesezko hitz bat bada moda berriarentzako: staycation (ikus ingelesezko Wikipedian hitzak daukan sarrera oparoa). Londresko gobernuak milioi askotako kanpaina antolatu bide du kontzeptuaren inguruan. Irlandakoak bide beretik jo du. Australiakoak No Leave, No Life esloganarekin sustatu du gisa bereko kanpaina, bakantzetan sorterrian geratuko diren herritarrei zergetan 900 dolarreko kenketa agintzen diena.

Giro honetan, herritar askok kanpina zein ederra izan daitekeen deskubrituko du. Hotzaldi ekonomikoan gu baino urte eta erdi lehenago erori zirenez, kanpinaren beroaldia gure aurretik nabaritu dute AEBetan eta Britainia Handian. Time astekariak azala eman dio gaiari: Camping. Call of no so Wild (Kanpina. Hain basa ez denaren deia; Jack Londonen The Call of the Wild-ekin hitz jokoa eginez). Egia da artikuluak desmitifikatzaile kutsua duela, antzinako kanpaldien eta orain jendeak egiten dituenen arteko alderaketak eginez eta beste. Baina azala ikusi baino ez dago ohartzeko kanpina une honetako fenomeno sozialtzat hartu dutela munduko astekari nagusietakoan.

Asmatu beharko dugu Staycation nola esan euskaraz. Modan egongo da laster.