Norvegia

Atalak: Irratirakoak

[Euskadi Irratiko “Faktoria”ko iritzi tartean argitaratua, 2009-09-28an]

Egun on, entzule.
Joan den ostiralean Donostiako Zinemaldigunearen atarian geunden giza talde zabal anitza Euskaldunon Egunkariko auziperatuei babes sinbolikoa eskaintzen. Kulturako jendea gehiena, zehazkiago protagonistak ziren zine-zuzendari, ekoizle, arizale eta gainerakoak. Atzetik Oreretako norbaitek gogorarazi zigun justu biharamonean zirela bi urte Luis Goia zinema produktorea hil zenetik.
Luis Goia gizarajoa, 2003ko otsailaren 20an Guardia Civilaren Madrilgo egoitzan arnasestuka entzuten genuen, ito beharrean:  nor izan ote zitekeen gurekin bere patua partikatzen zuen agure zahar hura? Ala gure lagunetatik zein izan zitekeen Guardia Civilaren eskuetan hainbesteraino zaharkitua ordu haietako tratuagatik? Duela bi urte bihotza lehertuta hil zela Goia oroitarazi zigun lagunak, agian zinemaldiko haren kolegek ahaztua izango zuten beldurrez, “Egunkaria libre” aldarrikatzeko topaketan. Bitartean, lau ertzain genituen espaloiaren beste aldetik begira. Ez naiz kexatuko, egon zitezkeen gu zaintzeko ere, ez zeukaten itxura erasokorrik, Europako beste edozein poliziaren tankera hartzea bazeneukan haiei. Broma txar hau bururatu zitzaidan: Finlandiako, Suediako edo Norvegiako poliziak lez jokatzea deliberatu ote dute? Hala biz. Ez dakit jakin duzun, entzule, Ertzaintzako sindikatuetako batek Estrasburgeko auzitegira eraman duela gure poliziei Eusko Jaurlaritzak greba egiteko ezarri debekua. Prentsan publikatu denez, lana uzteko eskubidearen aldeko argudioetako bat omen zen Suedia, Norvegia eta Finlandiako poliziek onartuta daukatela. Ni ados zuekin, ertzainok, baldintza bakarrarekin: baldin eta jokabidean ere haiekin parekatzen baldin bazarete. Ez du balio erantzutea nagusiek hau edo bestea agindu dizuetela, ez: gizarteari egin diozue zin, edo Estatutuari, baina ez Aresi. Ikasturte berria hasi da eta ekin diezaiogun asmo berrituekin. Ertzainak polizia nordiko izaten ahaleginduko dira, ETAko kideek irlandesen bideari helduko diote eta Audientzia Nazionaleko epaileek uko egingo diote turkiarren ereduari.
Pasa egun ona, entzule.