Soziedadea

Atalak: Irratirakoak

[Euskadi Irratiko “Albiste faktoria”ko iritzi tartean argitaratua, 2009-10-26an]

Egun on, entzule.
Nik ez dut eskuratu Batasuna burutzen ari den barne eztabaidaren txostena. Gara egunkarian plazaratu dutenetik ezagutzen dut ziklo berriari ekiteko proposamena. Agiriaren zatietatik, esaldi honekin geratu naiz: “Ez dugu nahikoa barneratu garaia heldu dela aldaketa politikoari bide egiteko eta honek behartzen gaituela geure buruak aldatzera”.
“Gara”koak gaztelaniaz honela zioen: “Esto nos obliga a cambiarnos a nosotros mismos“. Ondo esana iruditzen zait bizitzaren edozein arlotan. Egia esan, Euskal Herriko ezker abertzale ilegalizatua ez da salbuespena; Europako alderdi eta mugimendu ezkertiar gehienak dabiltza garai berriotarako barrendik aldatu nahian. Ezkertiarrei ez diete balio eskubiko alderdi kontserbadore diruz ustelduen egiturek, baina XX. mendeko formula leninistek ere ez, frogatuta baitago zein antzuak diren zentralismo demokratikoa eta abangoardismoa. Bestelako gizarte bat aldarrikatzen duen mugimenduak egituratik hasita eguneroko lanean erakutsi behar du bera ere bestelakoa dela. Agian ereduak ondoko atarian dauzkagu. Begiratu soziedade izeneko elkarte edo txoko gastronomikoei. Ez dira elkarte perfektuak, baina bai edozein erakunderi -izan alderdi, enpresa edo gaztetxe- antolaketan eta barne demokrazian lezioak emateko modukoak. Bazkide bat, boto bat. Erabakiak asanbladan. Diru kontuak erakutsi sozioen begien aurrean zehatz-mehatz. Agintaritza eta ardurak / txandakatuak eta derrigorrezkoak. Zuzendaritza rotatorioa. Eguneroko erabakietan autokudeaketa, eta aldi berean bazkideen autokontrol zorrotza. Asko hitz egin da, arrazoi osoz, soziedadeetan emakumeari utzi izan zaion lekuaz, baina askoz gehiago dago hitz egiteko haien barne demokraziaz. Entzule: politikan aipatzen da helburuek bitartekoetan azaldu behar dutela. Helmuga bezain inportantea dela helbidea. Gizarte berri bat aldarrikatzen duen edozein erakundek eduki behar luke gutxienez zure soziedadeak edo nireak daukaten adinako barruko parte-hartze demokratikoa.
Pasa egun ona, entzule.