Israel-Gaza: “Berun urtua II”

Atalak: Sailkatugabeak

Zertarako atakearen bideoak ikusi? Militar israeldarrek mila bider isuri dute errugabeen odola telebisten aurrean eta gaurko irudiok eragindako haserrea ere baretuko zaigu. Aldiz, aspalditik dakigu Israelgo agintariek gutxitan egiten dutela ezer kasualitatez.

Bart gauean Israelgo armadak nazioarteko uretan laguntza humanitarioz zamatutako baporeei eraso eta oraingoz ziur ez dakigun jende kopurua hil duenean, itsasontzietara helikopteroetatik militarrak tiroka jaitsita… zer lortu asmoz egin ote dute?

1-. Gazaren setioa bortizki mantendu, duela urte eta erdi “Berun urtua” operazioari jarraipena emanaz?
2-. Errotik eten Gaza eta Zisjordaniara mundu osotik inguratzen den laguntza solidarioa?
3-. Aurreko presidenteen ildo estrategikoa pittin bat aldatu duen Barack Obamari (datozen egunotan hartu behar zuen Washingtonen Netanyahu) indar erakusketa egin?
4-. Azken urteotan munduko geopolitikan posizioa ahuldu zaiola ikusita hesia hausteko erasoa oso bortitza jo?

Shimon Peres bakearen Nobel sariduna presidente eta Ehud Barak Osloko itunaren sinatzailea armadako buru, Israelgo estatuak munduko herritarroi mezu garbia bidali digu goizaldean: haiei ez die axolik gainerako mundutar jentilen iritziak, Israelen interesek ez dute ez neurririk eta ez mugarik. Gaurkoa indarra erakusteko eguna zen eta gero gerokoak.

Eta hala ere, edo justu horregatik, protesta egingo dugu.