Langile eta kazetari

Atalak: Sailkatugabeak

Gazte nintzelarik egunkariek “Laboral” atala eduki ohi zuten gaur “Ekonomia” daukaten lekuan. 1970eko hamarkada bukaerako krisiaren erdian egunkariak erosten hasi ginenean gure inguruko inor ez zen okupatzen burtsaz. Langileen seme-alabak ginen eta gure inguruan aktualitatearen zati handi bat (politikak eta kirolak funtsean eta hein txikiagoan kultura-espektakuluek osatzen zituztenen ondoan) enpresen itxierek eta langileen mobilizazioek okupatzen zuten: grebak zirela, manifestazioak, itxialdiak, …

Zaharkeria hori (“haiek bai garaiak!”) behin baino gehiagotan kontatu diet kazetari gazteei, argudiatzeko batetik gauzak beti gaur ikusten ditugun moduan ez direla egon eta bestetik gauza bera modu ezberdinetan aztertu eta erakutsi daitekeela. Norbaitek egitekotan hedabideotan ari garenok egiten dugu ideologia.

2008an mundu osoarekin batera ziklo ekonomiko berri batean sartu garenez, nabarmena da gauzak aldatzen ari direla, eta oso azkar. Orain, gure buruari helburu profesionaltzat oparitu diogunok gainerako herritarrei errealitatea osatzen duten albisteak eskaintzea, egokitu behar ditugu gure irizpideak aro berrirako.

Ekainaren 29ko Greba Orokorrarekin Hego Euskal Herriko langilegoaren zati nagusiak bere protesta erakusten du gure gaineko agintari nagusiek (munduko, Europako, Espainiako…) ekonomiaren ugazaben mesedetan soldatapeko langileen eta mikro-jabeen bizkar hartu dituzten neurrien kontra. Greba horrekin komunikabideetako langile asko bat egiten ari gara. Baina konpromisoa askoz haratago eroan behar dugu.

Munduak aspaldi ezagutu ez duen bezalako krisi sakonean sartuta gaude eta oraindik ondorio beldurgarrienak ez zaizkigu begien aurrean azaldu. Ikusi behar ditugu, tamalez. Kazetariok, jendeei lagunduko diegu gertatzen ari direnak hobeto ulertzen eta gerta daitezkeenetarako hobeto prestaturik egoten? Ala segiko dugu aurreko zikloan, munduko ekonomiaren beroaldi zoroan, egin dugun moduan ugazaben agenda zurruna txintxo betetzen?