Fukushima, osteguna 24

Atalak: Sailkatugabeak

10:10 Martxoaren 12tik gaur arte Fukushimatik atera eta munduan zabaldu den erradioaktibitatearen datu zehatzak ezkutuan dauzkate. [Mila esker informaziook osatzeko pistak pasatzen dizkidazuen guztioi]. Fukushimako istripu nuklearra honela dago:

– Lehen egunetan zentraletik barreiatu den erradioaktitatea Txernobylgotik 1986an zabaldutako guztiaren %10 da gutxienez. Greenpeacek salatu zuen, Frantziako INSR Institut de Radioprotection et Sûreté Nucleaire ofizialak berretsi zuen eta gaur Espainiako prentsak berak lerroburuetan ez baina letra ttikietan aitortzen du.

– Tokyo hiri erraldoian (35 milioi biztanle) iturriko ura galarazita dago haurrentzako erradioaktibitateagatik. Fukushimako departamenduan ekoiztutako barazkien debekua dozenatik gora berduratara hedatu dute.

– Argindarra oraindik ez da erreaktore guztietara heldu, nahiz eta aste bete pasa den Tepco enpresak “ia-ia lortu dugu” zabaldu zuenetik.

–  Sciendes et Avenir aldizkariko zuzendari Dominique Legluk jakinarazi du orain INSR instituko adituak  lanean ari direla Legluk herenegun proposatutako hipotesi larriaren gainean, hau da: 3. erreaktorea zartatuta dago, hor barruko konbustioak atmosferako airearekin kontaktoan ari dira gertatzen, uranioaz gain plutonioa ere badaukanez oso kutsaketa larria ari da eragiten eta baliteke barruko erregaia ontziaren altzairuarekin funditu izana, eta inkluso oinarri fisiko bera (hormigoizko zorua) dagoenekoz egonkorra ez izatea. Gainera, litekeena da 2. erreaktorea ere (leherketa jasan zuen arren kamerek ez dute bildu) antzeko bidetik abiatu izana.

– CRIIRAD Erradioaktibitateaz Ikertu eta Informatzeko Erakunde independienteak urgentziazko dei bat egin zien atzo Frantziako eta munduko agintariei eskatuz azaldu ditzatela martxoaren 12tik isuri erreadioaktiboez bildu dituzten datu zehatzak: “Colère et Indignation: Les chiffres relatifs à la contamination de l’air existen mais ils sont confisqués par les Etats!” (PDF). CTBTO Saiakera Nuklear Guztien Debekuaren Erakundeak mundu osoan dauzka behatokiak zabaldurik eta horiek egunotan kutsadura erradioaktiboaz bildu duten informazioa herritarrei berehala jakinarazi behar zaiela aldarrikatu du CRIIRADek.

– Fukushimako zentrala hozteko asteak beharko dira Le Mondek eta beste komunikabideek zabaldu dutenez. Zentrala betirako desegin edo egonkortzeko, berriz, urteak aipatzen dira edo… hamarkadak (artikulu hau irakurtzeko Le Monderen harpidedun izan beharra dago).