Fukushima, igandea 27

Atalak: Sailkatugabeak

16:55 Kutsadurari dagokionez, dagoenekoz Fukushimako istripua eta Txernobylgoa ez daude elkarrengandik hain urruti. Energi kontuetan gaztelaniazko webgunerik sinesgarrienetakoa den Crisis Energéticak gaur sareratu du ondoren euskararatzen dugun artikulu garrantzitsua: “La contaminación ya acerca Fukushima a Chernobil“.

“Hedabideen erantzuna egunak pasa ahala hoztu egin den arren, ezin esan gauza bera gertatu denik Fukushima Daiichiko zentral nuklearrarekin. Orain bi egun bi langile kaltetu zituen ur oso erradiaziodunari gehitu zaizkio orain itsasoko zentral inguruko uretan aurkitu den erradiazioa, baimenduta dagoena halako 1.850 handiagoa, eta hau ere gehitzen ari da, bezperan leku horretan bertan bider 1.250 neurtu baitzuten. Bestalde, 2. erreaktorean ari ziren langileak handik atera behar izan dituzte, bertan dagoen erradioaktibitatea normala halako 10 milioikoa delako. [Agintariek esan dute gero kopuru hori ezinezkoa dela eta neurketa berriak egin behar dituztela. Oso handia behar du, edonola ere].

Oraindik ere zaila da jakitea zer ari den gertatzen erreaktoreetan, dauden erradiazio maila handiek iradokitzen dute horien babes primarioak zartatuta daudela, baina beste aldetik, erradiazioa turbinen salan aurkitzeak adierazi nahiko luke pitzatuta dagoela erreaktorearen oinarrian toro forma daukan egitura, hura hozteko osagai nagusietakoa dena.

Kutsadurari dagokionez, iturri eta metodologia batzuen arabera, Txernobylen aurkitutako maila baino are handiagokoa litzateke. Japoniako asahi.com hedabideak aipatu ditu Kiotoko unibertsitatean ingeniaritza nuklearra irakasten duen Tetsuji Imanakaren hitzak: honen arabera, Iitate herrian (Fukushimako probintzian) aurkitu diren zesio-137 kopuruak, 163.000 bekerel lur kiloko, bihurtuko balira metro karratutan, metroko 3,26 milioi bekerel emango lukete; Txernobylgo istripuan metro karratuko 550.000 bekerel aurkitu ziren lekuak derrigor ebakuatu ziren. Aldiz, hedabide berak aipatzen du Nazioarteko Energia Atomikoaren Erakundeko zuzendari nagusiak dioela ‘Fukushimako istripua larria den arren, oraindik goiz da Txernobylgoarekin alderatzeko’.

Hala ere, Alemaniako Greenpeacekoek bai diote Fukushimako istripu anitzak 7. maila harrapatu duela (Txernobylgoaren pare). Segurtasun nuklearreko aditua den Helmut Hirsch-ek egin duen informean oinarritu dira, eta honek dio dagoenekoz zabaldu duen erradioaktibitate kopuruarekin 7. mailan sailkatu behar dela”.