Fukushima, Ap-06: arrantzaleak lanik gabe, onddoak biltzeko debekua, Korea protestan

Atalak: Sailkatugabeak

Fukushimako hondamendi nuklearraren egunerokoaz jakiteko merezi du bisitatzea Greenpeacek gai honentzako martxan daukan kanala: Espainiako Greenpeacek Crisis Nuclear en Japon orria 24 orduoro aktualizatzen dute. Atzo hor jakin genuen Korea kexu dela Japoniako agintariek ur erradiazioduna itsasoratu dutelako eta Fukushima departamenduko arrantzaleak xomaian daudela praktikan.

New York Timesek publikatutakoak bere eginez, Greenpeacek ezagutarazi digu AEBetako agintariak oso kezkatuta daudela Fukushiman dauden erregaiak oso egoera txarrean daudelako. Itsasoko ura botatzean gatzak areagotu ditu horien arazoak eta dirudienez errefrigerazio planek ez dute helburua lortzen. Kutsadura gehiagoren eta, larriagoa dena, leherketa gehiagoren beldur dira.

Fukushima eskualdeko arrantzaleak lanik gabe daude. Lurrikarak eta tsunamiak bapore asko hondatu zizkienaz gain, gainerako itsasontziek harrapatutako arraina saltzerik ez dute lortzen. Eskualde hartan, bestalde, shiitake perretxikuen bilketa eta salmenta debekatu egin dute; jakina da onddoek asko biltzen dutela erradioaktibitatea.

Orain arte eskualde ofizialki kutsatutik atera dituzten 50.000 familetako bakoitzari 10.000 euroko kalteordainak eman behar dizkie Tepco konpainiak (ez dakigu urte osorako, erdirako… edo betirako). Hori horrela bada, 500 milioi euroko pagakizunez ari gara. Gutxi da baina zerrendaren hasiera da (Fukushimako erreaktoreen gainean Txernobylgoa bezalako sarkofagoa eraikitzea 700 milioi kostatuko litzatekeela esan da. Gehiago izanen da).

Hemengo prentsak zabaldua du, ozenki, zentral inguruko uretan Iodo 131 aurkitu dutela legezkoa halako 7,5 milioiko kopuruetan, eta Zesio 137 berriz legezkoa halako 1,1 milioiko kopuruetan. Izugarrizko zenbakiak dira, baina urruti daudenez kuriositate amiñi batez begiratu litezke hemendik. Aldiz, hurbilago dagoen Koreak protesta egin du japoniarrek ur erradiazioduna itsasoratu dutelako eta Indiak berriz Japoniatiko elikagaiak inportatzea debekatu du. Fukushimaren nazioarteko eragina mamitzen hasi da.