Fukushima, Ap-14: Osasunaren Munduko Erakundea isilik erradioaktibitatearen kalteez

Atalak: Sailkatugabeak

The Guardian egunkarian Hellen Caldicott mediku eta aktibista australiarrak plazaratu duen “Nola nuklearraren apologistek mundua engainatzen duten erradiazioaz”artikuluan esplikatu du nuklearren kalteez munduak daukan informazio faltaren gakoetako bat, benetan eskandalagarria: “1959az geroztik, Munduko Osasun Erakundeak (MOE) ez du informaziorik eskaintzen erradioaktibitatearen eta osasunaren arteko loturez. Zer gertatu zen? 1959eko maiatzaren 28an, bere 12. mundu batzarrean, MOEK sinatu zuela itun bat Energia Atomikoaren Nazioarteko Agentziarekin (EANA), zeinaren 12.40 puntuak baitio: ‘Bi erakundeotako batek (EANAk edo MOEk) proposatzen baldin badu programa edo jardueraren bat hastea beste erakundeak interes funtsezkoa daukan gai batez, lehenak kontsulta egingo dio bigarrenari gaia elkarren arteko adostasunez lotzeko’.

Eta jarraitzen du Hellen Caldicottek: “Beste hitzetan esanik, MOEk bere ikerkerketei aldez aurretik baimena emateko eskubidea aitortzen dio EANAri; jende askok, tartean kazetariek, uste dute EANA behatzaile neutral bat dela, baina benetan EANA indar nuklearraren industriaren abokatua da. EANAren fundazio agirian dio: ‘Agentzia saiatuko da azkartzen eta zabaltzen enegia atomikoaren laguntza munduko bakeari, osasunari eta aberastasunari’”.
Duela bi urte, 2008ko martxoan, ARGIAko Net Hurbil atalean kontatu zen “Txernobylgoaren ondorio larriak estaltzeko konplota”. Honela hasten zen artikulua: “Suitzako Genevan Munduko Osasun Erakundeak (MOE) duen egoitzara hurbiltzen bazara, atarian protestari talde bat topatuko duzu. MOEren independentzia aldarrikatzen dute eta Txernobylgo zentral nuklearraren leherketak gizakietan gaur ere eragiten dituen kalteak aztertzeko batzordea osatzea”. Urteak pasa arren, han segitzen dute For Independence of WHO taldekoek etenik gabe. 190 aste daramatzate protestan beren buruak Hipokratesen zaindariak izendatu dituztenok, asko mediku eta osagileak baitira.

Txernobylgoaz aitortu beharrekoak esan gabe egonik, orain Munduko Osasun Erakundeari heldu zaio Fukushimakoaz mintzatu beharra. Ikusiko da zenbat berandutzen den.