Txernobylez, ospakizunen biharamunerako

Atalak: Sailkatugabeak

Inportantea ez da Txernobylgo hondamendia juxtu gaur 25 urte gertatu zela, inportantea da hartatik deus gutxi ikasi duela gizadiak. Gauzak bestela antolatu zitzaketen agintariek batere ikasi ez eta herritarren masak ikasitako pittina ahaztu. Berriro. Apirilaren 27tik aurrera telebistek irratiek egunkariek ez dute haboro Txernobilyk haizatuko. Pentsa, Fukushima oraintxe ari da egosten eta ahaztu dute dagoeneko…

Beraz, hona Txernobylez oroitzeko gaur bezala bihar edo etzidamu balioko dizuten erreferentzia batzu. Txernobyl eta bere inguruak  erakutsi ditu urteotan Elena Filatovak bere blogean. 2003an egin zuen lehen itzulia motoz, eta ordudanik ikusi dituenak foto eta bideotan eskaintzen ditu, hamairu hizkuntzatan ipinitako hitzez. Orri honetatik eskura daitezke Filatovaren irudi ederrez gain Interneten Txernobylez dauden bideo askorekiko loturak. Tartean hau, Frantsesez Le mistère de la mort de Valery Legasov eta ingelesez The mistery of Valery Legasov death. Txernobylgo hondamendia kudeatzea egokitu zitzaion zientzialariaren ixtorioa, istripuaren lehenbiziko egunak gertutik ezagutu zituzten lekukoen hitzekin.

Bestetik, erradioaktibitatearen eraginetan aditua den Eduard Rodriguez Farré biologoak eta UNED unibertsitateko matematiken irakasle  Salvador Lopez Arnalek urgentziazko liburu batean bildu dituzte azken denboretan erdibana idatzitako artikuluak. Internetetik eta libre jaitsi daiteke ¿Por qué Chernobil no fué la última advertencia? (PDF). Lehen atala (El poder del lado oscuro de la fuerza. Presiones, falacias e intereses atómico-nucleares) Gladys del Estali donostiar Egiakoari dedikatu diote.

Txernobylekin ikasi ez genuen seinale, Bartzelonako La Vanguardiakoek Rodriguez Farrégana jo behar izan dute Fukushimakoaren ondorioez galdezka. Ikusi hemen erantzunak: “Fukushima puede contaminar nuestra alimentación“.