‘Fuji mendia gorriz’: Kurosawak amesgaiztoan aurreikusi zuen Fukushimakoa (zentsuratua)

Atalak: Sailkatugabeak

Akira Kurosawa (Japonia, 1910-1998) zuzendariak, Zazpi samuraiak, Ran eta beste zenbait film gogoangarri egin zituen hark, zahartzaroan Ametsak (japonieraz Yume, Interneten ingelesezko Dreams ipinita aurkitzen da errazen) izenekoa ekoiztu zuen 1990ean. Kurosawak bere bizitzan zehar edukitako zortzi ametsetan oinarritua, bosgarrena da Mount Fuji in red, Fuji mendia gorriz. Hona ingelesezko Widipediako sinopsia: “Pelikulako bigarren amesgaiztoa. Fuji mendiaren inguruan zentral nuklear handi bat hasi da lehertzen, zerua gorri beldurgarriz margotzen du eta milioika japoniar bidaliko ditu desesperazioan lasterka itsasoan barnatzeraino. Hiru pertsona heldu eta bi haur geratu dira lehorrean, baina laster ohartuko dira erremediorik gabe hilko dituela erradiazioak”. Ikusi Armslice izeneko musikari batek egindako egokitzapena, ingelesezko azpitituluekin:

Armslicek filmaz egin duen egokitzapenak 4:44 irauten du. Baina berez zazpi minutu ingurukoa da film zati hori. Nola ikusi osorik? Lanak hartu behar dituzu. Hona zergatik. Fuji mendiaren gibeleko sei erreaktoreak lehertzen diren zatia, 1:45 irauten duena,  ingelesezko azpitituluekin ikus dezakezu hemen:

Leherketaren ondoren azken bizidunek hondartzan daukaten elkarrizketa italianoz doblatuta daukazu 4:59 irauten duen zati honetan:

Baina gaztelaniaz YouTuben bilaka hasita… horra miraria:  Kurosawaren amets guztiak dauzka produktorak txukun Interneten ipinita salbu eta Monte Fuji en Rojo , helbidean klik eginik honako oharrak emango baitizu ongi etorria (euskara txukunean!): “Bideoak Warner Bros. Entertainment bazkidearen edukia du, eta bazkideak bideoa blokeatu du copyright-arrazoiengatik. Barkatu eragozpenak.” Pantailaren azpikaldeko teklekin jolasean gainerako ametsak ikusi ahal izango dituzu ederki. Ez dizkiogu barkatuko eragozpenak Warner Brosi. Horra XXI. mendeko zentsura: