Idatzi Asakoren etxera, nuklearrei aurre egiten lagundu

Atalak: Sailkatugabeak

Asakoren etxea da Japonian zentral nuklearrei aurre egiten dieten herritarren ikurra. Oma herrian, J-Power erraldoiak 1982an erabaki zuenetik hor erreaktore nuklearra eraikitzea, Kumagai Asako borrokatu zen hori eragozteko, lur haietan zeukan etxea zutik atxikiz. Orain konpainiak etxea eraitsi nahi duenean, haren familiak laguntza eskatzen dio munduari: egunero gutun bat etxera iristea dute helburu, postaria egunero joan dadin bertara. Ixtorioak badu mamia

Omako zentral nuklearra eraikitzeko proiektua abiarazi zutenetik herritar gehienek etsi duten arren, Asako Kumagaik ez zuen lurrik saldu, bi milioi dolar eskainita ere. Asako 2006an hilik, haren alaba Atsuko Ogasawarak ere uko egiten dio lurrak saltzeari: “Pertsonaren bizian dirua ez da dena, ez dut saltzeko asmorik“, deklaratu du. Baina alaba jaiotetxean bizi ez denez, bidea itxi nahi dio konpainiak, inor ez dabilelakoan, etxea desjabetzeko. Japoniako militante antinuklearrak kanpainan daude Asakoren etxea zutik atxikitzeko: mundu osotik gutunak bidaltzea eskatzen dute, postaria egunero joan dadin bertaraino. Idatzi helbide honetara:
Asako House
aza-kookuto 396
Oma-machi. Shimokitagun
Aomori Pref.039-4601
Japan

Frantsesezko Fukushima-over-blogek zabaldu du kanpainaren berri Europan. Familiaren gutuna ingelesez Fukushima Diary blogean irakur daiteke. CNIC Citizens Nuclear Information Center gunean ere bai.

ABC telebistaren Foreign Correspondant programak saio berezia eskaini dio gaiari, The Fukushima Syndrome, YouTuben hiru zatitan ikus daitekeena. Atsuko Ogasawararen lekukotasunarekin hasten da:

Erreportajea hobeto ulertzeko, testua osorik ingelesez transkribatuta hemen irakur daiteke.