Nafartarren interes orokorra

Atalak: Kondarrak

Cementos Portland enpresak 2012ko maiatzean Nafarroako Gobernuari eskatu dio Olatzagutiako labeetan hiri hondakinak erretzea “interes orokorreko” izenda dezala. Gizartearentzako interes orokorrekoa izan behar omen du Hondakinetatik Eratorritako Erregaiak (HEE) -espainolez Combustibles Derivados de los Residuos (CDR) eta ingelesez Refuse-Derived Fuel (RDF)- zementua ekoizteko labeetan kiskaltzea. Hain preziatua den petrolioa aurreratu beharra dago, gasa eta ikatza bezala. Maiatzean bertan Espainiako Greenpeacek plazaratu du “La puerta de atrás de la incineración de residuos. Análisis económico-ambiental de la utilización de combustibles derivados de los residuos (CDR) en España“. Bertan esplikatzen da nola dagoen osatuta Olatzagutian erre nahi duten erregaia: “gainerakoak” atal nahasiaz gain, %12 egurra, %13 paper-kartoiak, %14 oihal jendea eta %31 plastikoa, gehi gainerako %30 nahasia. Egurra, papera, oihalak eta plastikoak birziklatu ez baina labean erretzea gizartearen interesekoa dela, alegia. Gobernuak berresten badu eta herritarrek ontzat ematen, ondorengo urteetan hobeto homogeneizatuko dute erregai berriztagarri eta CO2 emisio aldetik neutroa omen den hori. Esan nahi baita, hurrengo fasean HEE-CDR-RDF hori hobeki prestatu eta estandar teknikoak betetzen dituen Solid Recovered Fuel/ Specified Recovered Fuel (SRF) bihurturik helduko dela labeetaraino, euskarazko Erregai Solido Berreskuratua honela osatuta egongo delarik: %35 plastikoak, %30 paper-kartoiak, %20 egurra eta %15 oihala. Ez esan nahasketa hori guztia, aurrez ondo lehortu (%20 baino gutxiagoko hezetasuna, mesedez, labeak ez du urik maite) eta neurriko aleetan birrindurik porlana egin behar duten labeetan kiskaltzea, ez dela interes orokorrekoa. Guztion interes sozialekoa: denok pagatuko dugulako hondakinok zementugileentzako biltzea, sailkatzea, lehortzea eta txukun paletizatzea. AENORek zertifikatuko du alearen kalitatea.