Alduntzin eskandalua
2012ko uztailaren 6an Gipuzkoako Batzar Nagusiek aukera historikoa galdu dute ikerketa batzorde bat antolatzeko hondakinen kudeaketaren plangintzan aurreko hamar-hamabost urtez lurraldeko instituzio nagusietan gertatutako lotsagarrikeriaz. Junteroz osatutako ikertaldea bataiatu zezaketen “Garmendia batzordea” edo “Zubieta batzordea edo “Errauskailuaren batzordea” edo besterik gabe “PIGRUG ikerketa batzordea”. Ehun urte barru ere eskandalu galanta iritziko baitiote Juan Karlos Alduntzin ingurumen eta azpiegitura diputatuak PIGRUGari egindako aldaketekin mahai gainera atera duenari: Gipuzkoako hondakinak kudeatu daitezkeela Xabier Garmendiak idatzi eta ondoren garaian garaiko Mankomunitateek eta Diputazioak eta Batzar Nagusiek onartutako PIGRUGarekin baino hobeto, garbiago eta merkeago, prezioaren erdian zehazki. Zergatik zertarako noren artean nola noren mesedetan zeren truke antolatu ote zuten plana horrela? Harrigarriki, Gipuzkoako alderdi politiko gehienek Alduntzinen proposamen hori bera erabili dute diputatua kargutik kentzeko eta aldun nagusi Martin Garitanori mehatxu egiteko bide horretatik segitzekotan bera ere kanporatu egingo dutela. Gipuzkoarren parlamentua omen denak pulamenturik ez daukala-eta inoiz affaire itsusi honen barrunbeetan arakatzeko ikertalde herritarra osatzen badute “Alduntzin eskandaluaren batzordea” deitu beharko diote.
Bestalde, esanguratsua da “zentsuratzaileek” eta “zentsuratuek” bilkurako mintzaldiak egiteko egin dituzten hizkuntza-aukera ezberdinak. Nik lotsa pasa nuen Ezeizabarrenarekin.