“Etorkizuneko uztak”, Marie-Monique Robinen azkena Arte katean urriaren 16an

Atalak: Iritzia

Le Monde selon Monsanto eta Notre poison quoitidien (Eguneroko gure pozoia) filmetan bezala liburutan klasikoak utzi dizkigun Marie Monique Robin nekaezinak astearte honetan, urriak 16, ilunabarreko 20:50etan, Arte katean presentatzen du bere azken ikerlana: Les moissons du futur (Etorkizuneko uztak).

Hil arte espainol izatera kondenaturik bizi nahi ez duen euskaldun orok behar luke etxean telebista frantsesak ikusteko modua. Erreza da: Hendaiatik Baiona arteko edonon erosi TNT Sat sintonizadorea (gaztelaniazko TDT simaur-pilak sintonizatzeko behar denaren prezio beretsuan) eta antenazaleari eskatu satelite egokiari begira ipintzeko parabolikoa. Ez du iPhone berria baino askoz garestiago izan behar, hortik aurrerakoak debalde dauzkazu, adios betirako garrulo zalapartariz betetako sasitertuliak, reality karibeñoak, ETBko informatiboak ere kutsatu dituzten kaleko kronista tonboleroak, La Rojaren balentriak, ongi etorri informatibo zibilizatuak, filme ezezagunak, kazetariak nardatzen ez zaituen dokumental txukunak eta agintari politikoei begietara begiratuz egindako galdera zehatzak.

Total, Espainiako TDT nazkagarriak baizik iresten ez dituena lehenbizikoz ikusten duenean harriturik liluraturik haluzinaturik utziko duen Arte  kate franko-doixtarra ikusi baldin badezakezu, berdin dio zeure etxean edo amorantearenean, ez alferrik galdu asteartekoa. Marie Monique Robineri txarrena ateratzen zaiola ere dokumentu ona ekarriko du. Alegia, kimikoz oka egindako mundu honetan jakiak modu naturalean eta garbi ekoizteko ahaleginetan ari diren nekazarien lekukotasunekin prestatu duena. Les moissons du futur-ek poz pittin batez ordain diezaiguke Robinen aurreko ikerlanek utzitako ahoko garratza.