Navajo eta aberats? (3/3)

Atalak: Sailkatugabeak

[Bestelako Navajo (1/3) eta Navajoen harmonia (2/3) sarreren jarraipena] Tony Hillermanen lehenbiziko liburuak ingeles amerikarretik frantsesera Danièle eta Pierre Bondilek itzuli zituzten. Irakurleari gauzak errazteko, nobela bakoitzak amaieran hiztegi ttipia darama, Navajotarren eta gainerako indiarren ohituren azalpenekin.“Hilendantzaleku”ren (“Là où dansent les morts”) 247. orrialdean, Religion sarreraren ostean honela azaltzen dute itzultzaileek Richesse:

“Aberastasuna: Puebloak  [ingelesez nahiz frantsesez ere pueblo] antolatzen dira gizabanakoa taldearen menpe egoteko oinarriaren inguruan, eta honek dakar halako igualitarismo bat; anglo-saxoien anbizio pertsonalak eta enpresa izpirituak ez daukate, beraz, baliokiderik gizarte hauetan, zeinetan ohiturek eta mendetako arauek erabakitzen baitituzte lanen eta lurren banaketak.

Navajoei dagokienez, jabe izateko nahia da gaitzik okerrenen sustraia. Liburua dedikatzen zaion Alex Atcittyk honela dio: ‘Erakutsi didate zuzena dela bakoitzak daukana edukitzea. Baina norbait hasiz gero gehiegi edukitzen, horrek erakusten du bere jendeaz ez dela arduratu behar adina. Bat aberastu baldin bada, esan nahi du besteren gauzak hartu dituela. ‘Navajo aberatsa’ esatea da ‘ur idorra’ esatearen pareko’ (Arizona Highways, 1979ko abuztua)”.

[Izan ARGIAko bazkide: astekariaren harpidedun edo argia.eusen laguntzaile]