George Ibrahim Abdallah aske

Atalak: Iritzia

Mundua biribila da gurpil zoro bat bezala. Atzo jakin dugunez, herenegun Parisen hiltzaile profesionalek hiru ekintzaile independista kurdu garbitu dituzte hotzean. Gaur, aldiz, zabaldu da azkenean George Ibrahim Abdallah aske geratuko dela.

Irakurle maite hori, baldin eta interesatzen bazaizu zer gertatu zaien herenegun Sakine Cansiz, Fidan Doan eta Leyla Soylemezi, presta zaitez urte luzez jarraitzera horien hilketaren hariari. Agian ez duzu sekula jakingo oso garbi gauzak zehazki nork-nola-zergatik egin dituen, baina zaude ziur ez dela kunplituko lehenbiziko orduetan agentziek eta hedabide nagusiek insinuatu dutena: kurduen arteko kontu garbiketa. Kafea joka dezakezu lasai.

1) atentatu odoltsua Parisen; 2) hildakoak erresistentzia erakunde batekoak; 3) negoziaketak hastear; 4) geopolitika aldetik potentzia bat baino gehiagoren interesa tartean. Zeuk jarri Ekialde Hurbileko potentzien izenak eta hasi marrazten horien arteko harreman nahasiak, zerrendan ahaztu gabe Frantzia bera. Hori egin ondoren, tarte bat baldin baduzu, leitu itzatu ARGIAko bi artikulu zaharrok, Henri Curiel baten eta egunotan berriro albiste den George Ibrahim Abdallahren kasuak aipatzen dituztenak.

Henri Curiel hil egin zuten. George Ibrahim Abdallah gaur bertan jakin da askatzekotan direla, 28 urte zuloan pasa ondoren. Behin eta berriro ukatu diote baldintzapeko askatasuna zenbait preso euskaldunek ezagutua duten gizonari eta honek bere eskubideen galdea auzitara eramanik, Parisko auzitegi nagusirainoko kalbario luzea ibilarazi diote frantsesek.

Igoal Sakine Cansiz, Fidan Doan eta Leyla Soylemez lasai ibiliko ziren, pentsatuz Parisen seguru zeudela. Gerra zikina inguruotan aspaldiko kontua zelakoan.

Izan ARGIAko bazkide: Astekariko harpidedun edo webgunearen laguntzaile.