Zabor-turista in fraganti

Atalak: Kondarrak

Pentsa ezazu, irakurle, hernaniar jator hau datorren autobus gorria Astigarragan gelditu dutela txapelgorriek, ez esan zipaioak mesedez. Urumea ibarrean jende susmagarri asko ibiltzen da batetik bestera eta ez denak errumaniarrak. Gure gizonak ez dauka planta onik, txapela darama buruan begibistakoa izan arren horretarako adinik ez duela. “Ea, zabaldu motxila hori mesedez”.

“Euskaraz badakizu?” galdetu dio xuabe txapeldunak eta orain bixera daraman txapelgorriak: “Pixka bat, pero vamos a hablar en castellano, porque pixka bat ya es mucho“. Han azaldu da paketea. Drogak usaintzen berezitutako zakur batek ere harrapatuko zuen, sagar azal eta txustarrek aroma berezia daukate plastiko barruan.

Alferrik esplikatuko zuen gure lagunak Hernanitik Donostiara ez baina Donostiatik Hernanira zetorrela eta hori aski argigarri bazela. Keba. Biharamonean Diario Vascok letra larriz titulatuko zuen: “Miembro de Hernanin Zero Zabor detenido mientras hacía turismo de basuras“. Hiru minutu beranduago, Facebook eta Twitter sutan jarriko zituen jelkide hernaniarren buruak: “Ya os había dicho que aquí todo cristo hace turismo de basuras.  Ya veís, hasta los talibanes estos del Zero Zabor“.

Gure gizona, eman dezagun Talo deitzen dela, azkenean bideoz saiatuko zen argitzen benetako egia: “Zabor turismoa egin dut“.

Baina hi nora hoa, bideo kaxkar horrekin eta gainera euskaraz? Biharamun goizeko kafea mikaztuko dik agian lagun handiren batek: “Ikusi al duk periodikoa? Zein duk zaborrak eramaten harrapatu duten hire koadrillako hori?”. Inork ez dik  sinetsiko hik bulegotik hondar organikoak etxera eramaten dituala, Donostian oraindik gaikako bilketa txukunik antolatu gabe daukatelako.