Euskal grebaren jarraian, Europa osoan ‘Blockupy’ ekainaren 1ean

Atalak: Gizartea, Nazioartea

Maiatzaren 30ekoak ekainaren 1ean izango du bigarren zatia. Hego Euskal Herrian mugimendu sindikalaren zati nagusiak bestelako mugimendu sozial multzo zabalarekin antolatutako grebaren biharamonean, ekainaren 1an murrizketen eta horien kudeatzailea den Troikaren kontrako ekintza eguna dago deituta Europa osoan barrena.

Blockupy Frankfurt, deialdia

2012an Alemaniako Frankfurten mugimendu ezkertiar eta alternatiboek burutu zuten Blockupy protestaldiaren bigarren edizioa izanen da larunbatean. Orduan bezala orain ere Europako Banku Zentrala inguratzen ahaleginduko dira, bera delakoan Nazioarteko Diru Funtsarekin eta eta Europar Batasunaren agintaritzarekin batera milioika europarren bizimodua itolarriraino estutu duten murrizketen arduraduna.

Gutxienez Portugal, Espainia, Grezia, Italia, Britainia Handia, Irlanda, Alemania, Frantzia, Austria eta Hollandan ari dira hainbat ekintza prestatzen. Esaterako, Madrilen Marea Ciudadanak dei egin du Nazioarteko Diru Funtsak Madrilen dauzkan bulegoak okupatzen saiatzeko; bere gunean aurki daitezke Europako beste hainbat hiriburutako antolakizunak ezagutzeko loturak. Portugalekoen berri Povos Unidos contra a Troika blogean leitu.

Ezker alternatiboko intelektual eta politikari ezagunen sinadurak bildu zaizkie Blockupyren deialdiari. Portugalekoek Jose Afonso kantariak hil aurreko elkarrizketa batean esana oroitarazi dute: “Egonezina zabaldu beharra daukagu. Hasten bagara aitzakiak sorten gure konformismoa justifikatzeko, orduan dena izorratu dugu! Astindu egin behar da, ez geratu geldirik, ausartak izan, politikan bezala musikan”.

Blockupy-Frankfurt, 2012an