#siria Korapiloa NBEren Segurtasun Kontseiluan

Atalak: Nazioartea

Berrian (“Barealdiaren osteko ekaitza“) Mikel Rodriguezek laburbildu du Siriako gas erasoaren gatazkak bizi duen blokeoaren gako bikoitza: “Errusiaren eta Frantziaren arteko bilerak argi utzi du Siriaren inguruan Moskuk eta Mendebaldeak desadostasun sakona dutela. Eraso kimikoaren erantzukizuna zehaztea eta NBEren ebazpena dituzte eztabaidagai”. Alegia, abuztuaren 21ean Ghoutan sarin gasa nork erabili zuen eta Kerry-Lavrov itunaren haritik Segurtasun Kontseiluak adostu beharreko erabakiak zein gogortasun maila edukiko duen.

Le Monde paristarrak ekaizpean baino blokeaturik dakusa egoera: “Syrie : blocage persistant au Conseil de sécurité de l’ONU”. Egunkari horrek berak aurreratua zuen duela egun batzuk “Accord Kerry-Lavrov sur la Syrie : la subtile diplomatie du chapitre VII” analisian ituna ikuspegi juridikotik: Amerikarrak eta errusiarrak ez zeuden ados Nazio Batuen Erakundearen kartak VII. atalean esaten duenarekin, alegia, nazioarteko itunak errespetatzen dituen gobernu bati erasotzeko eskubidea badela. Frantziako atzerri ministro Laurent Fabius atzo bertan izana da Moskun Lavrovekin eztabaidatzen gaia, Frantziak hartu baitu (Britainia Handiko parlamentuak David Cameroni Sirian eraso ez dezan hegoak lotu ostean) OTANeko indarren jarrera gogorraren aitzindaritza.

Aste honetan Segurtasun Kontseiluak erabaki behar duen testuaz gain, jokalari ezberdinak ez datoz bat Ghoutako sarinaren erruduna markatzen. Mendebaldeak ia aho batez erruduntzat dauka Baxar Al-Assad. New York Times: “U.N. Data on Gas Attack Points to Assad’s Top Forces” (NBEren informazioak gas erasoaren erantzunkizuna Assaden eliteko indarrak seinalatzen ditu), lekuan izandako ikuskatzaileen informazioak erabili bide ditu, jaurtigailuen ibilbideak garbi erakusten dutela Al-Assaden tropa berezienen kasernan eduki zutela jatorria. Aldiz, Russia Todayk uste du Al-Assadek badituela frogak erantzukizuna matxinoei egozteko: “West-accused Syria gives Russia new evidence of rebel hand in chem attacks” (Mendebaldeak seinalatutako Siriak Errusiari eskuratu dizkio eraso kimikoen atzean matxinoen eskua dagoela demostratzen duten froga berriak).

Arma kimikoen episodio ikaragarritik haratago, Siriako gerraren bestelako ikuspegi bat eskaini du lekuan bertatik Karlos Zurutuzak Gara egunkarian plazaratu “Donde Turquía apoya a Al Qaeda“. Turkiako Kurdistango Serekaniyetik kontatu du nola bizi duten gerra mugako herri horretako biztanleek, egunero ikusten dituztela iristen Siriako guduetara datozen mundu osoko jihadistak: gerraren fronteetako batek aurrez aurre dauzka Siriako kurduak eta Al-Kaedari lotuta Jabat al-Nusra taldekoak.

Garan bertan Mikel Aramendik idatzi du Al-Assadek berreskuratu duela azken asteotan iniziatiba. “Geneva eta Maalula artean” analisian azaldu du Siriako armadaren taktika: matxinoak hirietan inguratu-isolatu ondoren, haiek artileriaz gogor beratu eta azkenik etxez-etxeko garbiketa egitera Libanotik etorritako Hezbollahko gerrillariak bidali.