Nairobiko Westgatetik zenbat hilotz gehiago aterako dute?

Atalak: Nazioartea

Kenyako agintariek esanari jarraituz hedabide gehienek bukatutzat ematen duten arren Nairobiko Westgate hipermerkatuko erasoa, gaur The Guardian egunkariak zantzu berriak eskaintzen ditu oraindik informazio guztia atera ez dutela erakusten dutenak. Alde batetik, balitekeela oraindik erasotzaile batek bizirik eta tiroka jarraitzea; bestetik, aitortutakoak baino askoz gorpu gehiago atera behar dutela eraikinaren hondarren artetik.

Nairobitik informatzen ari den Afua Hirsch kazetariari zerbitzu sekretuetako kide batek azaldu dio Westgate lehertuaren aurrien artean jihadista bat bederen bizirik dagoela eta aurre egiten diela soldatu eta poliziei. “Kenya mall attack: dozens more bodies believed buried under rubble” kronikan, bestalde, Hirschek azaldu du hiriburuko gorputegietako batean lekua antolatu dutela 160 hilotz gehiago hartu ahal izateko. Ez dirudi hainbeste beharko direnik, baina bai asko handitu daitekeela orain arte aipatutako 67 hildakoen kopurua. Al Shabaab erakundeak Twitterrez aurreko egunetan zabaldua zuen Kenyako armadak hiperraren eraikina bonbaz lehertaraztean azpian harrapatu zituela 137 herritar bahitu.

Gainerakoan, berresten da erasotzaile jihadisten artean zen emakume britainiarra, Samantha Lewthwaite, atxilotuta daukatela eta ekintzaileetako asko Mendebaldeko zenbait herrialdetan bizi den diaspora somaliarrekoak direla.