Wipha tifoiarekin Fukushimak estrontzio gehiago isuri du itsasora
Fukushimako zentralaren planoan urdinez markatuta, estrontzio kutsadura azaldu den zanga-zuloa (Grafikoa: Asahi Shimbun)
Japoniaren eta munduaren zorionerako Wipha tifoiak ez ditu erdiz-erdi kolpatu ez Tokyo hiriburua eta ez Fukushimako zentrala. Hamazazpi heriotzak eta ziento erdi desagertzeak bezala kalte nabarmenenak Izu Oshima uhartean eragin ditu. Wiphak, halere, haizearekin batera eurite latzak eraman ditu Fukushimara, eta orain Asahi Shimbun egunkariak plazaratu duenez estrontzio erradioaktiboa zentraletik itsasora eraman du.
“Typhoon flushes out radioactive strontium at Fukushima nuclear plant” albistean zabaldu duenez, euriteetako ura estrontzioz kutsatu eta zanga-zulo batetik itsasoratu da. TEPCO konpainiak gaur, urriak 17, aitortu du estrontzio eta beste beta izpizko 1.400 becquerel litroko neurtu dituela erreten horretako uretan, itsasotik 150 metrora. Legeak agintzen duen gehienezko estrontzio isuria 30 becquerelekoa da. Bezperan, urriaren 16an, gune horretan bertan litroko 19 becquerel neurtuak omen zituen TEPCOk.
Azpimarratzekoa da beti ere neurketen datu guztiak Fukushimako zentral matxuratua kudeatzen duen TEPCO konpainiak emandakoak direla, neurketa independenteen berririk ez da.
Iruzkinik ez
Trackbacks/Pingbacks