AHT: Frantzian SNCF tren zerbitzu publikoa autobusak sustatzen

Urtarrilean plazaratu zuen Net Hurbilek  “AHTk hiltzen du Europan ehun urtez osatutako tren sarea“, oinarriturik Kris De Deckerrek egiten duen Low Technology Magazinek plazaratu “High Speed Trains are Killing the European Railway Network“artikulu txit gomendagarria (frantsesezko bertsioa ere bada: “La grande vitesse est en train de tuer le reseau ferroviaire europeen“. Orain magazine berak ezagutarazi du  California Rail News aldizkariak (AEBetan trenbide sare publikoa defenditzen duenak) emandako albistea: Frantziako SNCF tren zerbitzu publikoak (Espainiako RENFEren parekoa) ekin diola nazioarteko tren expresoen ordez autobus zerbitzuak eskaintzeari. Berak sortu berri duen iDBUS konpainia berriak eskainiko ditu 9 eurotik hasi eta 45 euro arteko tarifak Paris-Brusela, Paris-Londres, Lyon-Milan eta Lyon Bartzelona bidaietarako, zeinak gaur Abiadura Handiko Trenetan kostatzen baitira 180 baino gehiago.

Dio California Rail Newsek: “Frantziak bizi duen egoera ekonomikoan bidaiariak ez daude prest pagatzeko abiadura handiko trenen prezioak. Kontutan hartuz 2013an 180 milioi euro galdu zituela eta aurreko urtean 376 milioi euro gehiago, denetara abiadura handiko tren sarearen balioak 1.400 milioi euro galdu ditu. SNCFk dio TGVak ez duela behar adina etekin ematen bidaien kostuak asebete eta berrikuntzak egiteko”.

Abiadura Handiko Trenak Frantzian alde batetik, prezio guztiak garestitzearekin batera, ekarri du lehendik zeuden bidai luzeko trenak kentzea, bidenabar gauezkoak; eta bestetik, orain ageri denez, TGVaren eskaintza osatzeko low-cost tren eskaintza antolatu ostean, derrigortuak daude low-cost autobus lineak sortzera. AHTaren sustatzaileek beti aldarrikatu dutenaren kontra, AHTak betiko trena ito du, eta hegazkin eta autobusen bidaiak indartu.