Ebola: Hanburgon ‘betiko tratamenduek’ sendatu duten gaixoaren ikasgaia

Atalak: Nazioartea, Osasuna

Asko dira Ebola birusak gaixotuta bizirik atera direnak. Hanburgoko (Alemania) Eppendorf ospitalean sendatu denaren kasua, ordea, oso ondo dokumentaturik geratu da eta eritasun beldurgarriaren aurrean erabili beharreko estrategiez eztabaidatzeko aukera ematen du. Ikusi zergatik.

Ebolaren kontrako txertoa aurkitzea omen da, esaten digute osasun arduradun nagusiek, gaixotasunari atea ixteko gakoa. Frantsesezko Wikipediaren sarrera honetan irakur daitezke zientzialariek aurkitu nahi duten bakunaren ezaugarriak. Bertan irakur daitekeenez, ez da bestelako tratamendu alternatiborik, ez bada gaixoaren bizi kalitatea hobetzen laguntzen duten artapen sintomatikoak, funtsean Ebola den eraso masiboak gorputzari dakarzkion beste infekzioak, deshidratazioa, sukarra eta beste arintzen ahalegintzea.

Aldiz, justu tratamendu “aringarri” hauekin lortu dute Hanburgoko Eppendorfen bizirik ateratzea Sierra Leonetik bertara abioiz arrapaladan eramandako 36 urteko gizona, Munduko Osasun Erakundearen langilea. Kasuaren xehetasunak La Vanguardiak eman ditu gaztelaniaz “Volver a nacer después del ébola” kronikan, ingelesez Suediako Karolinska Institutetek “Severely ill Ebola patient saved by conventional intensive care” artikuluan. Biek iturritzat darabilte The New England Journal of Medecine zientzia aldizkariak plazaratu  informe hau: “A Case of Severe Ebola Virus Infection Complicated by Gram-Negative Septicemia”.

Karolinska Instituteren tituluak oso ondo laburbiltzen du egiteko dagoen eztabaida garrantzitsu baten mamia: Zertan gabiltza baldin eta ospitaleko larrialdi zerbitzu onen lanek salbatu baldin baditzakete Ebola harrapatutako gaixoetako asko? Galdera honek eraman beharko gintuzke Ebolaren aurkako estrategien funts ekonomikoa mahai gainera ekartzera. Alegia, nork nola enplegatu behar dituen Ebolaren kontra egon daitezkeen diruak, eta batera edo bestera erabili horrek zer nolako inplikazioak dakartzan Afrikako herrialdeentzako.

Laburbilduz, Ebolaren kontrako diruak multinazionalen eskuetan utzita hauek erabiliko dute bakuna eta botikak sortzen, beren etekinetarako. Gaixotasun larri eta kroniko gehienen kontrako borroka famatuen estrategia berdina da. Eta txit garestia, dirutan, alboko kaltetan eta ondorio sozialetan. Aldiz, Hamburgoko kasuak salatzen du Afrikan oinarrizko ospitalerik ez egotea edo horiek egoera tamalgarrian egotea dagoela eritasun beldurgarriaren hedatzearekin lotuta.