Ezezkoak galdu behar du Grezian

Atalak: Ekonomia, Grezia

Ez da bakarrik Europako establishmentak erabaki duela galdu egin behar duela. Pronostiko logikoena dirudi: ondo bidean, baiezkoak irabazi behar du igandeko erreferendumean.

ARGIAn behin baino gehiagotan konfiantzaz aipatu dugun Panagiotis Grigoriou antropologoak egunero ematen dizkigu greziarrek bizi eta sentitzen dituztenen pistak. Egunotan gida lanean Zikladetan barrena dabilerarik, Greek Crisis blogean “Brisures d’euro” kronikan kontatu du Naxoseko portuan herritarrek igandeko erreferendumaz esan diotena. Ostatuan bost lagunekin mintzaturik, hiruk garbi zeukaten ezetza emango zutela Syrizaren agintariekin batera, bat zalantzan zegoen eta bostgarrenak baietza emanen du: “Urtarrilean ez dut Syriza bozkatu eta ikusi Tsiprasekin nola dena izorratu den. Hori bai, aitortzen dut orain afera hobeto ulertzen dudala. Lehen bezala Troikaren oinpean berdin-berdin jarraitzea poliki baina seguru heriotzara joatea da, baina… hausturaren eta drakmaren bidetik abiatzea dudarik gabe abenturan eta ezagutzen ez dugunean sartzea da. Jendeak beste ezer baino gehiago beldurra dauka”.

Gero ostatuko jabeei galdetu die. “Ez dugu huts egin behar oraingoan. Herrialde osoa izorratu digute eta errauskailu ekonomiko gisako politika horrekin segitu nahi dute. Oraingoan muturrera botako diegu beren euro aleman madarikatua. Basta [sic]”. Eta geroxeago ohar hau: “Etxeetan bahitu behar ditugu igandean zaharrak. Ez daitezela baiezkoa bozkatzera joan”. Belaunaldi afera ere izan ohi dira erreferendumak.

Horraino Grigoriouk kontatua. Bitartean, Europako aginte faktikoak oro bultzaka ari zaizkio baiezkoari. Europako agintariak, inolako ez neutralitate eta ez lotsarik gabe. Grezian bertan, oligarkiaren esku dauden hedabide nagusi guztiak. Telebistetan, gobernu matxinoaren iritzia apenas aditzen den ERT telebista publiko zabaldu berritik harago. Paperean, ia denak dira oligarkiarenak. Eta oligarkiak ez du barkatzen. Ez Gipuzkoan eta ez Atenasen.